Pòtoprens, 16 novanm 2020 [AlterPresse] --- Konsèy lòd avoka Pòtoprens yo voye jete komisyon, Jovenel Moise mete kanpe, 28 oktòb 2020 an, pou ekri yon lòt Konstitisyon nan peyi a, nan yon pozisyon ki vin jwenn ajans AlterPresse.
Se yon desizyon, ki depaman ak Konstitisyon an.
Atik 282 pou rive 284, nan Konstitisyon an, prevwa nan ki kondisyon, yon pase men ka fèt nan manman Lwa peyi a.
Konsèy lòd avoka Pòtoprens yo di li sezi tande deklarasyon Jovenel Moise yo, ki di mèt Monferrier Dorval, bandi te sasinen, 28 dawout 2020, nan Pèlren 5, nan menm zòn kote Jovenel Moise rete an, t ap vin nan tèt swadizan komisyon, pou ekri yon lòt Konstitisyon nan peyi d Ayiti, si l te vivan.
Se menm Jovenel Moise sa a, ki pa respekte prensip pou chak pouvwa ret nan wòl yo, pou youn pa pran plas lòt, ki pa okipe ditou demann Konsèy lòd avoka Pòtoprens yo, pou gen yon komisyon ankèt entènasyonal, ki granmoun tèt li, sou kò sasinay sou mèt Monferrier Dorval lan.
Konsèy lòd avoka Pòtoprens yo voye yon pinga, kont zak gwo ponyèt otorite yo, k ap plonje Leta an nan katyouboumbe, pi plis chak jou.
“ Chak fwa gen desizyon ki pa respekte Lalwa, se nan reny gwo ponyèt ak laterè y ap mennen peyi a ”, dapre sa Konsèy lòd avoka Pòtoprens yo fè sosyete aa sonje. [mj rc apr 16/11/2020 17:00]
Consulter +
