Pòtoprens, 16 novanm 2020 [AlterPresse] --- Ant vandredi 13 pou rive dimanch 15 novanm 2020 an, bandi ak zam, yo poko idantifye, simen latwoublay, nan plizyè zòn nan peyi a, tankou nan Pòtoprens ak nan kèk vil pwovens.
Lannuit samdi 14 pou louvri dimanch 15 novanm 2020 an, moun yo pa rive idantifye touye 2 jèn gason, nan Mawotyè 75, komin Kafou.
Sitiyasyon sa a te soulve kòlè moun nan zòn nan, ki te pran lari pou ekzije limyè fèt, sou sikonstans ki antoure lanmò 2 jèn gason sa yo, nan Mawotyè.
Anpil moun kontinye denonse konpòtman otorite yo, ki pa janm pran ankenn dispozisyon pou asire sekirite popilasyon ayisyen an, k ap sibi zak laterè bandi ak zam yo, sou teritwa nasyonal la.
Nan depatman Latibonit, jou vandredi 13 novanm 2020 an, bandi ak zam te dappiyan 51 pasaje, ki te nan yon otobis Pòtoprens / Pòdepè. Ajan polis Udmo te fè yon operasyon, ki pèmèt yo lage, samdi 14 novanm 2020 an, pasaje sa yo, nan komin Basen Ble (depatman Nòdwès).
51 pasaje sa yo te viv move moman, anba men bandi ak zam yo, sòti vandredi 13 pou rive maten samdi 14 novanm 2020 an.
Yon lòt bò, lapolis nasyonal dAyiti di li sezi plis pase 410 kilogram dwòg marijwana, nan depatman Nòdès ak Nòdwès. [mj rc apr 16/11/2020 11:36]
Consulter +
