Pòtoprens, 09 novanm 2020 [AlterPresse] --- Avèk nouvo ekip demokrat, k ap pran pouvwa a nan peyi ameriken, apati 20 janvye 2021 an, ta sipoze gen yon lòt kalite politik, Ozetazini, ki p ap kore prezidan Jovenel Moïse, dapre plizyè moun, AlterRadio/ AlterPresse te poze kesyon.
Etazini pa nan zafè referandòm, Jovenel Moïse ap klewonnen depi kèk tan an, men pito se nan zafè eleksyon li ye, dapre analiz youn nan moun, ki te ekri Konstitisyon 1987 lan, Georges Michel, nan yon entèvyou li bay AlterRadio/AlterPresse.
Gen bagay, ki pral chanje, nan politik ameriken an, ki pa ta sipoze bon pou Jovenel Moïse, dapre Georges Michel.
« Kit repibliken, kit demokrat p ap tolere enstalasyon yon diktati nan peyi d Ayiti ».
Jovenel Moïse ap tann Konstitisyon li an, pou abiye diktati li vle foure nan gòjèt popilasyon an. Yon chimen, ki pral kreye yon gwo kriz nan peyi d Ayiti, dapre Georges Michel ki te patisipe nan ekri Konstitisyon 29 mas 1987 la.
Dèske Donald Trump pèdi batay eleksyon pou prezidan, Ozetazini, Jovenel Moïse tou pèdi yon gwo zanmi, yon gwo sipotè. Men, se batay, popilasyon ayisyen an pral mennen andedan peyi a, ki gen plis enpòtans, dapre pati politik Inifos.
Li posib pou prezans yon nouvo prezidan, Ozetazini, ede nan batay, k ap fèt, pou rive pi vit nan bon jan rezilta, nan peyi d Ayiti, dapre kowòdonatè jeneral pati politik Inifos la, Paul Denis.
Pwofesè Michel Soukar di li pa kwè se Ayiti ki pral youn nan pi gwo priyorite nouvo administrasyon ameriken an, paske Etazini gen yon kriz sante ak pwoblèm sosyal k ap ravaje l.
Prezidan Joe Biden pral monte nan yon peyi ki divize, gen anpil blesi pou li ta koumanse sikatrize.
Pwofesè Michel Soukar rekonèt posiblite tou, pou 4 lanne Donald Trump yo, ant 20 janvye 2017 pou rive 20 janvye 2021, kite tras.
Malgre se Joe Biden, ki pase, nan eleksyon madi 3 novanm 2020 an, pou vin prezidan Etazini, apati 20 janvye 2021 an, peyi d Ayiti pral toujou nan menm pwoblèm yo. Se dizon espesyalis nan relasyon entènasyonal ak nan kesyon diplomasi, Azad Belfort.
Pwoblèm peyi d Ayiti te genyen, ant lane 2017 pou rive 2021, sou administrasyon Donald Trump lan, se te pwoblèm ki te la depi sou demokrat yo. Se nan politik, nan nivo nasyonal, pou jwenn solisyon pwoblèm peyi d Ayiti yo, dapre Azad Belfort. [jep emb rc apr 09/11/2020 11:05]
Consulter +
