Haiti
Ti chèz ba

Ayiti : Feminis yo di non pou ensekirite k ap agrave vyolans sou fanm !


Ekri jou dimanch 8 novanm 2020

Dokiman sa a vin jwenn AlterPresse nan dat 7 novanm 2020

Pozisyon 9 Òganizasyon feminis ak1 feminis endepandant sou asasinay Evelyne Sincère, premye novanm 2020, nan Dèlma 24

Òganizasyon feminis yo estomake, endiye devan fason inimen yo detwi lavi Evelyne Sincère, yon elèv 22 zan yo asasinen 1e novanm 2020. Apre yo fin kidnape li, maspinen ak vyole li, yo lage kadav li, twaka tou ni, sou yon pil fatra, nan Delma 24, nan Pòtoprens. Feminis yo salye memwa viktim nan, epi prezante tout kondoleyans yo bay fanmi li, zanmi li ak kanmarad lekòl li.

Malerèzman, ansasinay Evelyne Sincère pa yon ka izole.

Se youn nan pami dividal jenn fanm ki viktim lanmò brital. Se youn nan pami latriye krim k ap plede komèt ak basès nan peyi a. An 2019, apre masak, ki te fèt nan sèten katye popilè Pòtoprens, ou te ka wè espetak bèt, ki t ap devore kadav viktim yo.

Sitiyasyon ensipòtab sa yo ap chache fè nou pèdi sou imanite nou, kreye laperèz, mete fren nan libète pou sitwayèn ak sitwayen sikile. Lè yo makònen kadav ak fatra, atoufè yo vle montre jan yo pa bay enpòtans ak lavi e diyite popilasyon an, espesyalman pou fanm yo ak pou moun ki defavorize yo.

Pase dwa moun anba pye, sitire enpinite ak kalbenday otorite Leta yo, tout sa ankouraje ensekirite k ap bwote lavi moun.

Depi ensekirite ap gaye, jèn fi ak fanm peye sa chè. Yo peye dirèkteman nan kò yo, ak maspinay fizik ak moral, epi ak kadejak, oswa atravè tribilasyon fanmi yo. Jounen jodi a, sitiyasyon ensekirite a ap anvlimen pou rive mete òje sitwayèn ak sitwayen yo. Nan konsa, pouvwa an plas la ap kapab alèz pou chanje an gwo ponyèt Konstitisyon an epi taye eleksyon sou mezi.

Feminis yo di NON ak zafè fè nou pèdi sou imanite nou. NON ak iresponsablite Leta, ki pa konnen devwa li pou pwoteje popilasyon an.

Feminis yo ekzije :

1. Arestasyon ak jijman kidnapè ak ansasen Evelyne Sincère yo.

2. Pou gen dispozisyon efikas ki pran, pou konbat ensekirite, demantle gang ame yo, mete kontwòl sou zam k ap sikile yo.

3. Mete an aplikasyon tout bon Plan nasyonal kont vyolans sou fanm nan, dekwa pou fè prevansyon epi ofri plis sèvis bay viktim yo.

Otorite yo gen obligasyon pou aji, aktivman epi ak dilijans, pou kwape ekzaksyon k ap plede fèt chak jou sou popilasyon an, espesyalman sou fanm ak tifi yo.

Vyolans sou fanm, se zafè tout moun !

5 novanm 2020

Pou otantifikasyon,

Yolette Andrée JEANTY, Kay Fanm

Siyatèz yo :

1. Kay Fanm

2. Solidarite fanm ayisyèn (Sofa)

3. Fanm Deside

4. Rezo fanm nan radyo kominotè ayisyen yo (Refraka)

5. Asosyasyon fanm solèy d Ayiti (Afasda)

6. Fondation Toya

7. Fanm Yo La

8. Nègès Mawon

9. Konbit Fanm Saj

10. Sabine Manigat, feminis endepandant