Español English French Kwéyol

Ayiti-Ensekirite : Fondasyon Je klere mande otorite yo, mennen bay lajistis moun ki ansasinen Evelyne Sincère yo

Pòtoprens, 04 novanm 2020 [AlterPresse] --- Òganis k ap defann dwa moun Fondasyon je klere (Fjkl) mande otorite konsène yo, fè bonjan aksyon pou idantifye, arete epi mennen bay lajistis,moun ki ansasinen ak ki konplis, nan kò sasinay sou Evelyne Sincère lan, dimanch premye novanm 2020 an, nan yon nòt ki vin jwenn ajans AlterPresse.

Divès lòt òganizasyon te revòlte kont kò ansasinay sou Évelyne Sincère, 3 jou apre bandi te dappiyanp li jedi 29 oktòb 2020 an.

Fjkl mande ekip, ki sou pouvwa an, rekonèt yo pa kapab jere peyi an, ni garanti dwa sitwayèn ak sitwayen yo genyen, pou yo viv tankou moun.

Nan yon moman, kote zak laterè yo ap ogmante pi plis chak jou, nan peyi an, pèp ayisyen an gen dwa lejitim pou li revòlte kont yon gouvènman gwoponyèt, gouvènman bout di, ki pa bay dwa a lavi okenn enpòtans, ki pa gen ankenn respè pou Konstitisyon peyi an, ni pou dwa popilasyon an genyen pou pwoteste kont tout sa ki fè l mal, dapre sa Fondasyon Je klere fè sonje. [rf emb rc apr 04/11/2020 09:05]