Pòtoprens, 30 oktòb 2020 [AlterPresse] --- Jovenel Moïse, ki kontinye meprize dizon yon bon pati nan popilasyon an, enstale, vandredi 30 oktòb 2020 an, sa li rele « yon komite konsiltasyon endepandan, pou ekri pwojè yon lòt Konstitisyon », li vle foure nan gòjèt peyi an, dapre enfòmasyon ajans AlterPresse ranmase.
Se Boniface Alexandre, ansyen prezidan tranzisyon (ant 29 fevriye 2004 pou rive 14 me 2006), Jovenel Moise mete nan tèt sa li rele « komite konsiltasyon endepandan, pou ekri yon lot konstitisyon », li ta vle mete nan peyi an.
Depi plizyè mwa divès sektè te deja voye pinga, yo p ap aksepte ankenn dispozisyon Jovenel Moise vle pran pou chanje Konstitisyon 1987 la.
Fason ekip tèt kale a vle fè sa depaman, nètalkole, ak jan Konstitisyon an prevwa sa.
Se nan dènye sesyon travay lachann, senatè ak depite kapab vini avèk pwopozisyon, pou ta pase men nan Konstitisyon an.
Depi lendi 13 janvye 2020 an, pa gen ni chanm depite, ni sena, nan peyi d Ayiti.
Jovenel Moise pa tande rezon. Li kontinye ap pran desizyon gwon ponyèt li yo. L ap fonse ak tout boulin nan rejim bout di li an. Depi vandredi 18 septanm 2020, li mete sou pye yon Konsèy elektoral pwovizwa, dèyè do Konstitisyon an.
Manm Konsèy elektoral sa a pa t menm al sèmante douvan Lakou kasasyon, jan sa konn fèt.
Douvan pakèt leve kanpe, kont swadizan Konsèy elektoral sa a, Jovenel Moise vin bay Konsèy elektoral sa a on lòt non.
Depi dat 9 oktòb 2020, yo rele l kolèj elektoral.
Premye misyon kolèj elektoral sa a, Jovenel Moise monte dèyè do Konstitisyon 1987 lan, se òganize yon referandòm, pou tabli yon lòt konstitisyon.
Konstitisyon 1987 la pa aksepte okenn kontmaltaye, ni lòt mannèv, pou vini ak yon lòt Konstitisyon, nan òganize yon referandòm. [jep rc apr 30/10/2020 16:00]
Consulter +
