Pòtoprens, 26 oktòb 2020 [AlterPresse] --- Sant analiz ak rechèch nan zafè dwa moun (Cardh) mande lakou entèameriken dwa moun bay dizon l, sou lè manda prezidan Jovenel Moise lan ap bout.
Jovenel Moïse sou wout pou pase anba pye l atik 23 konvansyon ameriken an, ki egzije yo respekte dwa, moun genyen, pou vote kòmsadwa.
Cardh fè demann sa a, paske Jovenel Moïse, ki gen manda l ap bout 7 fevriye 2021 an, deside ajoute yon lane sou li, jis nan 7 fevriye 2022, dapre direktè egzekitif Cardh lan, mèt Gédéon Jean.
Plizyè pati ak regwoupman politik deja lanse divès aksyon mobilizasyon, pou fòse Jovenel Moïse kite pouvwa a anvan 7 fevrye 2021.
Desizyon Jovenel Moïse pou pwolonje manda l lan ap pase anba pye, non sèlman Konstitisyon ayisyen an, ki defini manda eli yo, men tou atik 23 konvansyon entèameriken dwa moun nan, ki bay moun dwa pou vote, atravè eleksyon demokratik, toujou daprè mèt Gédéon Jean.
Demann Cardh fè an gen pou objektif pote kole nan devlòpman dwa rejyon yo, ki gen pou misyon pwoteje moun.
« Tout sitwayen dwe jwi dwa ak fakilte pou yo patisipe nan direksyon zafè piblik yo, swa dirèkteman, swa atravè yon entèmedyè, ki te pase nan yon eleksyon lib ». Se sa atik 23 konvansyon sa a, Leta ayisyen te asepte nan dat 14 septanm 1977, prevwa. [jep emb rc apr 26/10/2020 10:55]
Consulter +
