Pòtoprens, 22 oktòb 2020 [AlterPresse] --- Eleksyon lib, onèt ak demokratik p ap posib nan peyi an, toutotan se anbasad yo, k ap fè presyon pou yo fèt, menm si kondisyon yo pa reyini pou sa. Se dizon Mouvman libète, egalite ayisyen pou fratènite (Moleghaf), ki t ap pale ak AlterRadio/AlterPresse.
David Oxygène, alatèt Moleghaf, fè sonje se nan menm kalte eleksyon de grenn gòch sa yo, pisans enperyalis yo te vinn sipòte nan peyi an, ki te fè moun, tankou Joseph Michel Martelly oubyen Jovenel Moïse, rive sou pouvwa a.
Moleghaf pwofite ankouraje tout sektè, nan lavi nasyonal lan, kontinye kanpe anfas gouvènman Jovenel Moïse lan, ki pa sispann fè vye zak nan peyi a.
Nan yon medya nan kapital la, anbasadris Inyon peyi Ewòp yo nan peyi d Ayiti, Fransèz Sylvie Tabesse, fè konnen, akòz ensekirite a k ap layite nan peyi a, kondisyon yo pa reyini pou gen eleksyon nan peyi a.
Yon pozisyon, ki pa depaman ak deklarasyon plizyè òganizasyon politik ak dwa moun, k ap mande Jovenel Moïse kite pouvwa a, pou pi ta, 7 fevriye 2021. [jep emb rc apr 22/10/2020 10:40]
Consulter +
