20 oktòb 2001-20 oktòb 2020 : 19 lane depi Groupe Médialternatif ap pote kole nan demokrasi ak pwogrè nan kominikasyon, nan peyi d Ayiti

Pòtoprens 20 oktòb 2020 [AlterPresse] --- 20 oktob 2001-20 oktòb 2020 : sa fè 19 lane depi Groupe Médialternatif (Gm) ap pote kole nan bay demokrasi ak pwogrè jarèt nan kominikasyon, nan peyi d Ayiti, dapre enfòmasyon ajans AlterPresse ranmase.

Depi 19 lane, Groupe Médialternatif ap travay pou mouvman sosyal yo, tankou peyizan yo, mouvman fanm yo, moun ki andikape yo, yon bann lot sektè yo konn mete sou kote, kapab gen plis vwa nan medya yo, dapre sa kowòdonatè Gm nan, Gotson Pierre, fè sonje, nan okazyon an, nan yon ti koze ak tout ekip Gm nan.

Nan travay l ap fè yo, Groupe Médialternatif rete granmoun tèt li. Gm pa restavèk pèsonn, li pa janm resevwa lòd nan men okenn sektè, kit se nan pouvwa politik, kit se nan pouvwa ekonomik.

Kreye epi rann dinamik espas altènatif nan kominikasyon, nan benefis divès sektè sosyal yo, yon fason pou ankouraje patisipasyon yo nan yon chimen devlòpman moun, ki ka dire lontan, se misyon Groupe Médialtenatif bay tèt li, nan mitan medya ayisyen yo, depi oktòb 2001.

Andedan Groupe Médialternatif, nou jwenn divès estrikti oubyen inite, tankou ajans ki bay enfòmasyon sou entènèt AlterPresse (2002), inite pwodiksyon odyovizyèl Accès Media (2007), AlterRadio (oktòb 2015). [jep emb rc apr 20/10/2020 15:30]