Pòtoprens, 19 oktòb 2020 [AlterPresse] --- Plizyè pati ak rasanbleman nan opozisyon an mande popilasyon an toujou rete mobilize, jouk prezidan Jovenel Moïse deside rache manyòk li sou pouvwa a.
Pati politik Mouvman patriyotik popilè desalinyen an (Mopod) bat bravo pou yon bon pati, nan popilasyon an, ki brave danje epi pran lari a, samdi ki te 17 oktòb 2020 an, nan Pòtoprens ak plizyè lòt vil nan peyi an, nan yon entèvyou li bay AlterPresse.
Sa montre, yon lòt fwa ankò, popilasyon an pa nan Jovenel Moïse, dapre Mopod.
Youn nan pòt pawòl Mopod yo, Raphael André, mande popilasyon an toujou rete mobilize, jouk Jovenel Moise deside rache manyòk li sou pouvwa a.
Mopod fè konnen tou, nan nivo opozisyon an, y ap pwograme lòt mouvman, nan pwochen jou k ap vini yo, pou kontinye denonse Jovenel Moïse, k ap fè tout kalte mannèv, pou retounen ak rejim bout di an, nan peyi an.
Yon lòt bò, Direksyon politik opozisyon demokratik la wete chapo l douvan popilasyon an, ki te pran lari, nan dat 17 oktòb 2020 an, pou te kontinye mande jistis pou mèt Monferrier Dorval, etidyan Grégory Saint-Hilaire, Elias Eric Diogène (sekirite senatè Youri Latortue) ak tout lòt moun, gang ak zam sasinen nan katye popilè yo, sitou nan Bèlè, Lasalin, Pon wouj ak Site solèy, nan yon nòt ki rive jwenn AlterPresse.
Direksyon politik opozisyon an redi angajman ak volonte l pou retire Ayiti anba grif « tout pouvwa kriminèl, asasen k ap kraze peyi an, pase lalwa anba pye, demantibile Leta epi krabinen popilasyon an ».
Opozisyon an deklare l ap kontinye chita pale, ak lòt aktè, sou pi bon mwayen pou prepare dènye tranzisyon koupe fache a, pou pita aprè 7 fevriye 2021 an.
Nan yon lòt nòt, Sektè demokratik ak popilè, Konbit òganizasyon politik sendikal ak popilè yo, pwofite denonse, ak tout fòs yo, represyon pouvwa a fè sou manifestan yo, nan plizyè vil nan peyi a, espesyalman nan zòn metwopolitèn Pòtoprens lan.
« Bonè nan maten 17 oktòb la, endividi, ki abiye ak inifòm lapolis, kanpe nan yon seri pwen estratejik nan zòn metwopolitèn an, pou kouri dèyè moun k ap vin nan manifestasyon an, pou fè yo tounen. Malgre sa, se pa milye, moun yo te debake nan mobilizasyon an ».
Òganizasyon sa yo fè konnen y ap kontinye kole zepòl pou ranfòse batay pèp la, atravè divès lòt aktivite mobilizasyon, nan tèt kole ak tout sektè, k ap batay pou libere peyi a anba rejim kriminèl Phtk an epi chavire sistèm peze souse a. [rf emb rc apr 19/10/2020 14:26]
Consulter +
