Pòtoprens, 19 oktòb 2020 [AlterPresse] --- Ofis pwoteksyon sitwayèn ak sitwayen (Opc) denonse move zak, kèk ajan nan direksyon santral lapolis jidisyè an (Dcpj), ki touye, lannuit mèkredi 14 pou louvri jedi 15 oktòb 2020 an, yon ajan Inite sekirite jeneral Palè nasyonal (Usgpn), sou pretèks yo t ap chèche yon chèf gang, nan yon nòt ki rive jwenn AlterPresse.
Ofis pwoteksyon sitwayèn ak sitwayen leve lavwa kont esplikasyon, li di ki chaje ak manti, pòt pawòl Lapolis la, Michel-Ange Louis Jeune bay sou dosye sa a, nan laprès, kote l fè kwè polisye ki mouri an, Jean Rosner Glezil, pa t idantifye tèt li, nan moman operasyon ajan Dcpj yo.
Ofis pwoteksyon sitwayèn ak sitwayen, ki gen pou misyon defann dwa moun nan peyi an, di li gen gwo kè kase, douvan konpòtman, ki pa responsab, alatèt Polis nasyonal d Ayiti an.
Lè yo pa janm pran bon jan sanksyon kont polisye, k ap fè move zak yo, alatèt Polis nasyonal d Ayiti an pase anba pye dwa lavi epi ankouraje polisye manm li yo kontinye fè move zak sou popilasyon an. [rf emb rc apr 19/10/2020 10:33]
Consulter +
