Pòtoprens, 19 oktòb 2020 [AlterPresse] --- Madi 20 oktòb 2020 an, pral gen yon tribinal popilè nan peyi d Ayiti. Se pou jije Misyon nasyon zini pou estabilizasyon an Ayiti (Ministah), pou zak li te fè nan peyi a, epi egzije jistis ak reparasyon anfavè viktim kolera yo nan peyi d Ayiti, dapre enfòmasyon, ki vin jwenn ajans AlterPresse.
Se sa Platfòm ayisyen k ap plede pou yon lòt kalte devlopman (Papda), anonse, nan tèt kole ak plizyè lòt òganizasyon, tankou Platfom òganizasyon ayisyèn dwa moun (Pohdh).
Tribinal popilè a, nan peyi d Ayiti, pral louvri wout, pou gen lòt tribinal popilè entènasyonal, pou jije divès krim òganizasyon Nasyonzini te fè nan peyi d Ayiti.
Mèt Mario Joseph fè konnen dedomajman viktim kolera yo bloke, akoz gouvènman ayisyen an pa vrèman ede viktim yo nan sans sa a.
Se yon sityasyon, ki lakoz dosye a ap trennen.
Epidemi kolera an te lakoz lanmò 10 mil moun epi li te enfekte anviwon 800 mil lòt. Se te twoup peyi Nepal yo, ki te andedan Fòs lokipasyon nasyon zini yo, ki te pote kolera a nan peyi a, nan mwa oktòb 2020.
Mèkredi 21 oktòb 2020 an ap fè 10 zan, depi epidemi kolera a te koumanse gaye nan peyi d Ayiti, sou yon baz militè peyi Nepal, ki andedan Fòs lokipasyon nasyon zini yo, nan zòn Mibalè. [rf emb rc apr 19/10/2020 10:15]
Consulter +
