Haiti
Atik

Ayiti-Ekonomi : Sitiyasyon tansyon ak panik anba Dèlma, 13 oktòb 2020 an, pandan yon vizit enspeksyon ministè komès ak endistri


Ekri jou mèkredi 14 oktòb 2020

Pòtoprens, 14 oktòb 2020 [AlterPresse] --- Te gen yon sitiyasyon tansyon ak panik anba Dèlma, apremidi 13 oktòb 2020 an, nan moman kote minis komès ak endistri an, Jonas Coffy, t ap fè yon vizit enspeksyon, nan yon biznis, ki twouve l Dèlma 4, pou gade èske biznismann yo pa desann pri pwodui yo, malgre dola a bese, dapre enfòmasyon AlterPresse rasanble.

Anpil kout zam t ap chante nan nivo Dèlma 2 ak Dèlma 4, dapre temwayay yo.

Yon sitiyasyon tansyon, ki te lakòz anpil panik.

Madi 13 oktòb 2020 an, minis komès ak endistri an, ansanm ak plizyè jij de pè ak yon pakèt lot enspektè ministè komès ak endistri, te fè yon vizit enspeksyon nan plizyè biznis ak ponp gaz, pou gade si biznis sa yo respekte divès dispozisyon, ministè komès te pran.

Vizit enspeksyon sa a, se te nan objektif pou ministè komès te gade èske biznis sa yo vann epi afiche, nan goud, pri tout pwodui y ap vann yo, jan yo te deside sa nan yon desizyon 19 septanm 2018 ak kominike ministè komès te rann piblik ane 2020 an.

Ministè komès te vizite ponp gaz yo tou, avèk entansyon pou ta pran sanksyon kont tout pwopriyetè ponp gaz, ki ta derefize louvri pòt yo pou sèvi popilasyon an, poutèt yon bouch louvri ak konpayi k ap vann gaz yo.

Plizyè responsab ponp gaz te anonse y ap fèmen pòt yo, poutèt konpayi k ap vann gaz yo ta derefize ba yo, yon pati nan kòb yo dwe ba yo. [rf emb rc apr 14/10/2020 10:00]