Pòtoprens, 06 oktòb 2020 [AlterPresse] --- Asosyasyon pwofesyonèl majistra yo (Apm) konsidere lane lajistis 2019-2020 an, tankou yon lane pèdi, nan yon deklarasyon li voye bay laprès, nan okasyon seremoni ofisyèl, pou louvri lane lajistis 2020-2021 an, lendi 5 oktòb 2020.
Anpil mouvman grèv, nan aparèy lajistis lan, san konte peryòd eta ijans lasante an, avèk mikwòb kowona an : se kèk, pami eleman ki lakoz lane lajistis 2019-2020 an pase nan gagòt, dapre Apm.
Prezidan Apm nan, mèt Wando Saint-Villier, regrèt otorite nan Ministè lajistis ak sekirite piblik yo pa t janm fè anyen, pou te satisfè pwofesyonèl dwa ki te nan grèv yo, espesyalman grefye yo, ki sispann travay depi dat 28 jiyè 2020 an.
Se yon sitiyasyon, ki te anpeche moun ki t ap tann jijman, pou zak yo repwoche yo, pa t rive pase douvan jij yo kòmsadwa. [rf emb rc apr 06/10/2020 10:20]
Consulter +