Pòtoprens, 30 septanm 2020 [AlterPresse] --- Avoka moun, ki pote plent nan dosye PetwoKaribe an, deklare yo pote solidarite yo, bay jij, nan lakou Kasasyon yo, k ap resevwa menas, depi seremoni sèman, Konseye elektoral Jovenel Moïse yo, pa t rive fèt madi 22 septanm 2020 an, dapre enfòmasyon ajans AlterPresse ranmase.
Youn nan avoka sa yo, mèt Michel André, lanse yon apèl bay jij lakou Kasasyon yo, pou yo pa pwograme ankenn dat pou seremoni sa a fèt, menm si li rekonèt ekip tèt kale, ki sou pouvwa a, ap fè mannèv pou sa ta fèt, nan jou k ap vini yo.
Si jij lakou Kasasyon yo ta asepte fè nouvo Konseye elektoral yo vin sèmante douvan yo, y ap tou pase anba pye règ ki tabli nan kad travay yo, dapre konsiderasyon mèt Michel Andre.
Jij lakou Kasasyon yo pa gen dwa pou fè yon zak, ki depaman ak Konstitisyon an.
Se paske jij Lakoudèkont yo pa vle pran ankenn desizyon, pou fè ekip, ki sou pouvwa a, plezi, ki fè y ap resevwa kaponnay sa yo. Se dizon mèt Marc Antoine Maisonneuve, youn nan avoka, k ap defann moun ki pote plent nan dosye PetwoKaribe an.
Jij Lakoudèkont yo pa dwe pran nan presyon gouvènman an. Yo dwe kontinye fè travay yo kòmsadwa, nan limit lalwa ba yo.
Judes Charles Faustin, ki se sekretè jeneral biwo premye minis lan, deklare li pa pami moun, k ap fè menas lanmò sou majistra fanm nan lakou Kasasyon, Wendelle Coq, apre Asosiyasyon majistra yo te leve lavwa kont menas lanmò sou jij fanm Wendelle Coq. [emb rc apr 30/09/2020 09:50]
Consulter +
