Haïti-Koripsyon : Plizyè dizèn moun plante pikèt yo, 29 septanm 2020 an, douvan lokal Lakoudèkont, pou ekzije desisyon ki di ki moun ki dwe Leta nan lajan PetwoKaribe an

Pòtoprens, 29 septanm 2020 [AlterPresse] --- Madi 29 septanm 2020 an, plizyè dizèn moun òganize yon rasanbleman, douvan lokal Lakoudèkont, nan Pòtoprens.

Objektif rasanbleman sa a, se te ekzije jij Lakoudèkont yo rann desizyon, ki di, ki yès ki dwe Leta, pami moun ki te gen lajan PetwoKaribe yo nan men yo, dapre sa ajans AlterPresse te wè.

Sa fè plizyè plis pase yon mwa, depi Lakoudèkont te mete deyò dènye tranch rapò l sou lajan PetwoKaribe an, kote li mande otorite yo mete sou pye zouti, ki kapab pèmèt yo rekipere kòb PetwoKaribe a.

Rasanbleman 29 septanm 2020 an, se te okazyon pou manifestan yo mande jij Lakoudèkont yo, pa pran an konsiderasyon, nan nouvo bidjè l ap travay sou li a, nouvo Konsèy elektoral, Jovenel Moïse lonmen dèyè do Konstitisyon an.

Manifestan yo fè konnen nouvo Konsèy sa a pa gen anyen pou wè ak Konstitisyon an ak Lalwa.

Manifestan yo di, yo pa wè kouman li pral kapab òganize eleksyon lib, onèt ak demokratik, jan Jovenel Moïse vle fè kwè l lan. [rf emb rc apr 29/09/2020 14:30]