Pòtoprens, 29 septanm 2020 [AlterPresse] --- Òganizasyon ayisyen dwa moun (Ohdh) denonse zak, otorite yo ap fè, nan dosye ankèt, yo di ki louvri sou kò sasinay, 28 dawout 2020 an, sou mèt Monferrier Dorval, ki pa respekte prensip nòmal yo.
Rapò Direksyon santral lapolis k ap travay pou lajistis (Dcpj) pran an konsiderasyon sèlman egzekitan yo, san li pa panche sou mobil krim nan ak entelektyèl ki voye fè krim yo, daprè kritik kòdonatè jeneral Òganizasyon ayisyen dwa moun, Joinet Merzius, fè nan yon entèvyou li bay AlterRadio/AlterPresse.
Òganizasyon ayisyen dwa moun fè konnen, yon enstitisyon, tankou Dcpj, k ap mennen yon ankèt, sou yon dosye, gen sèlman pou l remèt yon jij rapò ankèt li mennen an.
Men, li pa gen pou l rann ni piblik sou rezo sosyal yo ak nan radyo, tankou jan sa fèt nan ka ankèt li mennen sou kò sasinay sou mèt Monferrier Dorval lan.
Modlet Sénégeau yo plis konnen sou non Abidy, Mackender Fils-Aimé ak Dunès Vilpique yo plis konnen sou non Jah, Marckenson Charles yo plis konnen sou non Cobra, Gerson Laurent yo plis konnen sou non Ti Lik oswa Louko, Richelet Augustin, Johny Toussaint, ta met tèt yo ansanm, pou ansasinen, nan dat vandredi 28 dawout 2020, mèt Monferrier Dorval, dapre yon rapò ankèt biwo, ki okipe zafè kriminèl ki nan Dcpj.
Otorite yo dwe mete manda, pou arete Marckenson Charles yo plis konnen sou non Cobra, Gerson Laurent yo plis konnen sou non Ti Lik oswa Louko, Richelet Augustin, Johny Toussaint, poutèt yo ta gen men yo tranpe nan kò ansasinay sou mèt Monferrier Dorval lan.
Richelet Augustin ak Johny Toussaint, se ta moun ki ta touye ak men yo mèt Monferrier Dorval. Yo ta twouve yo, menm kote ak viktim nan, pandan zak ansasinay la, toujou dapre rapò Dcpj an.
Òganizasyon ayisyen dwa moun yo tou profite denonse menas lanmò jij fanm nan Lakou Kasasyon, Wendelle Coq, ap resevwa, depi plizyè jou, nan telefòn, aprè enstitisyon te ranvwaye seremoni sèman 9 manm Konsèy elektoral provizwa (Kep), ki fèt dèyè do Konstitisyon an.
Asosyasyon nasyonal majistra ayisyen yo (Anamah) ak Rezo nasyonal majistra ayisyen yo (Renamah) mande otorite nan lapolis yo, garanti sekirite majistra fanm Wendelle Coq epi louvri yon ankèt sou dosye sa a. [rf emb rc apr 29/09/2020 10:15]
Consulter +
