Español English French Kwéyol

Ayiti-Politik : Estrikti òganis dwa moun, ki pote kole nan demach pou monte Kep, dèyè do Konstitisyon an, denonse atak kont moun ki deside vin manm Konsèy elektoral Jovenel Moïse la

Pòtoprens, 28 septanm 2020 [AlterPresse] --- Rezo obsèvatè nasyonal pou demokrasi ak dwa moun (Ronddh), yon estrikti ki te patisipe nan voye Guylande Mesadieu nan Konsèy elektoral la, ki fèt dèyè do Konstitisyon an, konsidere, tankou yon atak kont demokrasi, atak li di k ap fèt sou moun ki deside vin manm konsèy elektoral Jovenel Moïse lan, nan plizyè nòt ki rive jwenn AlterPresse.

Rezo òganis dwa moun sa yo leve lavwa kont atak, li di k ap fèt kont Guylande Mesadieu ak tout lokal òganizasyon l lan, depi apre yo te chwazi l kòm youn nan Konseye elektoral yo.

Li mande pou otorite konsène yo garanti sekirite Guylande Mesadieu, fanmi l ak tout lokal òganizasyon l lan, yon fason pou l kapab gen sante mantal li anfòm, pou l travay pou byennèt peyi l.

Enstiti mobil edikasyon ak demokrasi (Imed), ki andedan Rezo obsèvatè nasyonal pou demokrasi ak dwa moun, ki te pote kole tou nan demach pou chwazi Guylande Mesadieu an, leve vwa l tou kont atak, li di moun ak zam fè kont biwo Fondasyon zanmi timoun nan.

« Aksyon sa yo rann pi frajil tout sa nou rive jwenn, kòm gany nan batay pou demokrasi ».

Konbit pou lapè ak devlòpman mande moun ki kont enstalasyon manm Kep yo, pou yo fè prèv tolerans ak respè fas ak moun ki konsène yo.

Li pwofite kritike menas ak atak kifèt kont biwo Kolektif Defansè Plis ak Zanmi Timoun epi kont kay Antonal Mortimé ak madanm li, Guylande Mesadieu ki se manm Kep Jovenel Moïse la. [jep emb rc apr 28/09/2020 10:38]