Ayiti-Politik : Manm Kep, ki fèt dèyè do Konstitisyon an, poko ka koumanse travay, prèske yon semenn apre enstalasyon yo, nan Palè nasyonal, san yo pa t sèmante douvan Lakou Kasasyon

Pòtoprens, 28 septanm 2020 [AlterPresse] --- Jan divès sektè te prevwa sa, manm Konsèy elektoral pwovizwa (Kep), ki fèt dèyè do Konstitisyon an, poko ka rantre al travay, prèske yon semenn apre seremoni enstalasyon yo nan Palè nasyonal, san yo pa t sèmante douvan Lakou Kasasyon, daprè sa youn ladan yo di jounal “ Le Nouvellliste ”.

Konseye sa a, divès sektè pa rekonèt, fè konnen y ap rete tann jij Lakou Kasasyon yo òganize seremoni an, pou yo sèmante an, anvan menm yo koumanse travay.

Pou koulye a, li di poko gen ankenn dat, yo prevwa pou koumanse travay.

Konseye sa a, divès sektè pa rekonèt, deklare gen demach, nan nivo Lakou Kasasyon, nan lide pou yo kapab al sèmante douvan Lakou Kasasyon.

Guichard Doré, youn nan konseye espesyal Jovenel Moise yo, te fè kwè konseye elektoral sa yo pa ta gen pou sèmante douvan Lakou Kasasyon, anvan yo rantre al travay.

Aprè Lakou Kasasyon te fin ranvwaye seremoni sèman manm Konsèy elektoral yo, Jovenel Moïse pa t ezite fè yon seremoni enstalasyon 9 manm Kep li yo, madi 22 septanm 2020, nan Palè nasyonal. [jep emb rc apr 28/09/2020 09:55]