Pòtoprens, 24 septanm 2020 [AlterPresse] --- Lajistis dwe pran bon jan dispozisyon sanksyon, kont tout moun k ap vòlè tit konseye elektoral, k ap pare kò yo, pou jwe wòl konseye elektoral nan peyi a.
Se dizon Kolektif 4 desanm 2013, ki di Konstitisyon an p ap rekonèt okenn konseye, toutotan yo pa al sèmante douvan Lakou Kasasyon, nan yon nòt ki vin jwenn AlterPresse.
Kòdonatè jeneral Kolektif 4 desanm 2013 lan, Jean Robert Argant, denonse Jovenel Moïse, li di ki pa sispann fè zak dèyè do Konstitisyon an.
Jovenel Moïse ap mache tèt bese devan kominote entènasyonal lan, epi, sou lòd yo, l ap fè yon bann move zak, ki pa kadre ak reyalite peyi d Ayiti.
Pati ayisyen tèt kale (Phtk) mande Jovenel Moïse retounen sou desizyon, li pran, pou mete kanpe yon nouvo konsèy elektoral nan peyi a, epi chèche jwenn yon antant, nan mitan tout sektè nan lavi nasyonal lan, anvan li òganize eleksyon.
Nan kondisyon Konsèy elektoral sa a monte a, kote Jovenel Moïse fè l poukont li, san akò ankenn lòt moun, pa gen posiblite pou konsèy sa a fè bon eleksyon, dapre prezidan Phtk an, Liné Baltazar.
Liné Balthazar fè konnen si prezidan an kontinye fonse ak tout boulin, nan poze zak ki dèyè do konstitisyon an, sa pral plonje peyi a nan yon twou san fon.
Malgre leve kanpe kont volonte diktati ekip tèt kale an, Kolektif Defansè Plis, ki patisipe nan demach Jovenel Moïse, pou mete kanpe yon Kep, ki depaman ak Konstitisyon an ak lalwa, di fòk gen yon antant, nan sosyete an, nan lide pou gen eleksyon nan peyi a.
James Deralus, direktè nan zafè jiridik òganizasyon Kolektif Defansè Plis, di li pa nòmal pou, depi plis pase 200 lane, toujou genyen yon chire pit, nan mitan Ayisyen yo. Sa a dwe fini, pou peyi a kapab pran wout chanjman an tout bon vre. [rf emb rc apr 24/09/2020 13:10]
Consulter +
