Haiti
Atik

Ayiti-Politik : Minis travo piblik lan Nader Joiseus debake an chango mèkredi 23 septanm 2020 an, nan Lakoudèkont


Ekri jou jedi 24 septanm 2020

Pòtoprens, 24 septanm 2020 [AlterPresse] --- Ansanm ak plizyè moun ak gwo zam lou, ki te vini nan machin san plak, Minis travo piblik lan Nader Joiseus debake an chango, mèkredi 23 septanm 2020 an, san otorizasyon, nan lakoudèkont, dapre enfòmasyon ki vin jwenn AlterPresse.

Detan te gen moun, ki t ap filme ak pran foto, nan espas sansib, alatèt lakoudèkont te deside fèmen baryè enstitisyon an, jis rive yon jijdepè pou fè konsta sa k pase an.

Nan laprès, Nader Joiseus, pou l defann tèt li, fè konnen li te vini depoze yon kontra konpayi jeneral elektrik S.A., ki gen arevwa ak konstriksyon yon santral elektrik 55 megawat nan komin Kafou.

Manm Lakoudèkont yo te okouran mwen te nan espas la pou sa. Minis travo piblik la fè konnen li te ak plizyè polisye, ki te la pou yo ba l sekirite.

Sityasyon sa a te kreye anpil bouch louvri. Sa ki te lakòz premye minis Joseph Jouthe te oblije vini prese prese, pou l te mete lapè nan sa k ap pase a.

Gen manm lakoudèkont, ki te konpare sitiyasyon sa a ak peryòd diktati Francois Duvalier an, lè rejim bout di an te konnn sèvi ak yon seri atoufè, tankou Antenor Bobo (yo te plis konnen sou non Ti Bobo) ak Bòs Pent, pou zak maspinay sou popilasyon an.

Nan dat vandredi 11 septanm 2020 an, premye minis Joseph Jouthe te blije prezante eskiz gouvènman li an, bay Lakoudèkont, pou jan Nader Joiseus te joure, ak pawòl piman bouk, manm Lakoudèkont, li te di ki se iyoran, nan yon aktivite, dimanch 6 septanm 2020 an, nan Palè nasyonal, yo rele dyalòg kominotè. Se te kondisyon pou manm Lakoudèkont yo te asepte chita pale ak premye minis Joseph Jouthe. [jep emb rc apr 24/09/2020 10:40]