Haiti
Atik

Ayiti-Politik : Ni eleksyon, ni lòt Konstitisyon pa posib ak Jovenel Moïse, ansanm ak gwoup gang ak kravat li yo, daprè pati politik Akao


Ekri jou mèkredi 23 septanm 2020

Pòtoprens, 23 septanm 2020 [AlterPresse] --- « Ni eleksyon, ni lòt Konstitisyon pa posib ak Jovenel Moïse, ansanm ak gwoup gang ak kravat li yo, ki mete zam nan men moun nan katye popilè yo ».

Se dizon pati politik Aksyon pou konstwi yon Ayiti òganize (Akao), nan yon nòt li voye bay AlterPresse.

Pati politik Akao fè konnen, ajitasyon ak divèsyon twit anbasad ameriken nan ak piblikasyon non manm Kep yo a p ap fè pèp ayisyen an bliye dosye asasinay mèt Monferrier Dorval lan, ni masak k ap fèt san rete nan Bèlè ak nan lòt katye popilè yo.

Pèp la p ap bliye dosye koripsyon yo, tankou PetwoKaribe, Dèmalòg, elatriye.

Pati politik Akao mande popilasyon an mobilize, nan 4 kwen peyi d Ayiti, nan lide pou chavire sitiyasyon, ki la jodi a.

Peyi Etazini te ekzije, ak anpil menas, pou mete kanpe yon Konsèy elektoral pwovizwa (Kep), nan lide pou òganize eleksyon nan peyi a.

Apre Jovenel Moïse fin rann piblik non moun, li chwazi pou vin konseye elektoral yo, gouvènman ameriken an deklare, limenm, l ap tann yon dekrè elektoral ak kalandriye eleksyon yo, pou ka remete sou pye palman nan peyi d Ayiti, yon fwa mwayen teknik yo va pèmèt sa.

Sou bò pa yo, divès pèsonalite ak òganizasyon politik, fanm ak dwa moun leve kanpe kont pwojè ekip tèt kale an genyen, pou mete kanpe yon nouvo Kep pou òganize eleksyon nan peyi a.

Malgre pa t gen sèman douvan lakou Kasasyon, Jovenel Moïse k ap fonse, ak tout boulin, nan zak pilonnen Konstitisyon peyi an, enstale manm Konsèy elektoral li an, alòske Konstitisyon an prevwa yo dwe sèmante sou Konstitisyon an, anvan enstalasyon yo. [rf emb rc apr 23/09/2020 13:30]