Ayiti-Politik : Plizyè òganizasyon, k ap defann dwa moun, bat bravo, poutèt Lakou kasasyon ranvwaye seremoni sèman manm Kep Jovenel Moïse yo

Pòtoprens, 23 septanm 2020 [AlterPresse] --- Plizyè òganizasyon, k ap defann dwa moun nan peyi d Ayiti, bat bravo, poutèt Lakou kasasyon ranvwaye seremoni sèman, manm Konsèy elektoral Jovenel Moïse yo, dapre enfòmasyon AlterPresse ak AlterRadio ranmase.

Nan yon lèt yo te voye bay Lakou Kasasyon, Òganizasyon sa yo te swete lakou kasasyon annile seremoni an, paske desizyon Jovenel Moïse lan depaman ak Konstitisyon an.

Òganizasyon, ki te siyen lèt sa a, se Sant Karl Lévêque (Skl), Pwogram pou yon altènativ nan lajistis (Paj), Rezo nasyonal k ap defann dwa moun (Rnddh), Komisyon episkopal nasyonal Jistis ak Lapè (Ce-Jilap), Sant analyz ak rechèch nan dwa moun (Cardh) ak Sant rechèch ak fòmasyon ekonomik ak sosyal pou devlopman (Cresfed).

Premye misyon egzekitif lan bay Konsèy elektoral sa a, se fè referandòm pou tabli yon lòt Konstitisyon, alòske atik 191 Konstitisyon amande a di, misyon Konsèy lan se egzekite epi elabore yon lwa elektoral ki dwe regle eleksyon yo.

Malgre pa t gen sèman douvan lakou Kasasyon, Jovenel Moïse k ap fonse, ak tout boulin, nan zak pilonnen Konstitisyon peyi an, enstale manm Konsèy elektoral li an, alòske Konstitisyon an prevwa yo dwe sèmante sou Konstitisyon an, anvan enstalasyon yo.

Malgre Konstitisyon 1987 lan pa bay prezidan okenn dwa, ni pou dirije anba dekrè, ni pou chanje konstitisyon an, atravè referandòm, konseye politik Jovenel Moïse lan, Guichard Doré, deklare konsèy elektoral yo an pa ta fèt, dèyè do konstitisyon a, nan yon entèvyou li bay AlterRadio/AlterPresse.

Guichard Doré tou rekonèt ekip tèt kale an ap pase anba pye Konstitisyon an, lè li di li te enpòtan pou Jovenel Moïse, nan peryòd kriz peyi a ap travèse a, mete sou kote atik 284.3 Konstitisyon an, pou l pran kèk desizyon pou amelyore kondisyon lavi popilasyon an.

Konstissyon an, nan okenn atik, pa bay prezidan pouvwa pou vini ak yon lòt Konstitisyon, ni pou mete sou kote okenn atik, sou pretès pou amelyore kondisyon lavi popilasyon an. [rf emb rc apr 23/09/2020 10:35]