Ayiti-Politik : Divès pèsonalite ak òganizasyon mande pouvwa ekzekitif la kanpe sou Konsèy elektoral pwovizwa a

Pòtoprens, 22 septanm 2020 [AlterPresse] --- Divès pèsonalite ak òganizasyon politik, fanm ak dwa moun, di yo kont pwojè pouvwa ekzekitif la genyen, pou mete kanpe yon nouvo Konsèy elektoral pwovizwa (Kep) pou òganize eleksyon nan peyi a.

Pati politik Rasanbleman demokrat nasyonal pwogresis (Rdnp) mande ekip, ki sou pouvwa an, rantre prese prese desizyon pou mete kanpe Kep li a.

Rdnp di li pa konprann ki sa ki esplike, jounen jodi a, pi gwo rèv pouvwa ekzekitif lan genyen, se chanje Konstitisyon peyi a, alòske, yon ti tan anvan sa, lè li te gen majorite nan palman an, li pa t janm montre li enterese nan sa.

Li fè konnen li pa twò ta pou evite peyi an tonbe nan yon tyouboum san parèy. Nan sans sa a, Rdnp mande tout fòs viv peyi a mete tèt yo ansanm.

Desizyon Jovenel Moïse lan, pou lonmen yon nouvo konsèy elektoral pwovizwa, depaman ak lalwa. Li parèt nan jounal ofisyèl Le Moniteur. Se yon pa, anplis, nan demach Jovenel Moïse ap fè, pou mete sou pye yon Leta delenkan nan peyi a. Se dizon Kolektif ansyen depite ak alye li yo, ki pa dakò ak rejim tèt kale an (Cadoa).

Tout òganizasyon, nan sosyete sivil lan, ki pran pozisyon kont zak sa yo, ki depaman ak Konsitisyon an ak lalwa, dwe mobilize, nan lide pou chanje sitiyasyon peyi a ap viv jodi a dapre Kolektif ansyen depite ak alye li yo.

Pou ansyen depite Jean Robert Bossé, ki se youn nan manm kolektif ansyen depite alye li yo, popilasyon an, ki granmoun tèt li, se pi gwo fòs, ki kapab kanpe an kwa kont pakèt bagay kwochi, Jovenel Moïse ap fè, depi lè l monte sou pouvwa a, 7 fevriye 2017.

Peyi d Ayiti antre byen fon nan yon rejim bout di. Se yon diktati. Depi se diktati, tout mounm dwe goumen kont li, ak tout kalte mwayen. Se analiz jounalis ak politològ Daly Valet, nan emisyon FwoteLide.

Nan menm emisyon sa a, feminis ak sosyològ Danièle Magloire fè konnen òganizasyon fanm yo te prevwa peyi a ap rive nan yon sitiyasyon, kote Jovenel Moïse pral eseye pran yon seri desizyon tèt chaje, ki depaman ak Konstitisyon an. Se pou sa, òganizasyon fanm yo te toujou ap voye pinga.

Detan l di li pran nòt sou desizyon monte Kep Jovenel Moïse lan, li te ekzije, ak anpil menas, peyi Etazini deklare, limenm, l ap tann yo rann piblik yon dekrè elektoral ak kalandriye eleksyon yo, pou ka remete sou pye palman nan peyi d Ayiti, yon fwa mwayen teknik yo va pèmèt sa. [rf emb rc apr 22/09/2020 11:45]