Pòtoprens, 21 septanm 2020 [AlterPresse] --- Pou pi piti 2 moun mouri anba bal plizyè lòt blese anba bal, anpil kay pase nan flanm dife gang ak zam, nan yon lòt atak ak zam ankò, nan katye Bèlè, Pòtoprens, samdi apremidi 19 septanm 2020 an, dapre enfòmasyon ajans sou entènèt AlterPresse rasanble.
Gang ak zam simen kout zam ak dife ankò nan katye Bèlè, samdi apremidi 19 septanm 2020 an.
Anpil fanmi, nan katye Bèlè, ki pa twò lwen Channmas, kote nou jwenn Palè nasyonal, pèdi divès zafè yo, nan lòt atak sa a.
Gen nan fanmi sa yo, ki te gen ti biznis, ki wè tout sa yo te achte pou vann yo boule.
Yon latriye fanmi te blije ap kouri sove po yo, douvan nouvo atak gang ak zam sa yo, kote yo rete a. Gang ak zam yo te simen kout zam san gade dèyè.
Menm jan ak lòt masak, gang ak zam yo ap plede fè nan katye Belè, depi finisman mwa dawout 2020 an, moun, ki sibi zak laterè sa a ankò, pa t wè okenn inite Lapolis nasyonal, ki te vin ede yo fè fas kare, douvan gang ak zam sa yo.
Se gang ak zam « baz krache dife », ki t al fè avari san sa a ankò, nan katye Bèlè, daprè temwayaj yo.
Gang ak zam sa yo te menm gen gaz lakimojèn nan men yo.
Metòd « baz krache dife an », lè l al fè zak laterè yon kote, se mete dife.
Menm temwayay sa yo rapòte « baz krache dife » sa a andegan gwoup gang, ki pot non G9 an fanmi ak alye yo.
Nan apremidi 31 dawout 2020 an, bò 5è, yon gwoup gang ak zam te atake zòn Bèlè, kote yo te tire anpil kout zam, blese plizyè moun anba bal epi mete dife nan plizyè kay.
Menm moun ak zam sa yo te retounen, mèkredi 2 septanm 2020 an, sou Bèlè, kote yo blese anpil moun ak bal epi mete dife ankò nan divès kay. [rf emb rc apr 21/09/2020 10:50]
Consulter +
