Pòtoprens, 21 septanm 2020 [AlterPresse] --- Nouvo Konsèy elektoral pwovizwa a (Kep), prezidan Jovenel Moïse mete kanpe a, pral mete peyi a nan plis tyouboum, daprè plizyè òganizasyon politik.
Desizyon Jovenel Moïse pran, pou li nonmen nouvo Kep a, p ap pèmèt peyi a sòti nan kriz lap viv depi kèk tan an.
Men pito l ap angrave konfli yo epi mete peyi a nan plis tyouboum. Se dizon Pati Rasin Kan pèp la, nan yon entèvyou li bay AlterRadio/AlterPresse.
Desizyon sa a mache nan liy pwojè lanmò Pati ayisyen tèt kale (Phtk) genyen an ak pwojè pou li kenbe pouvwa pou kò l, daprè pòt pawòl pati sa a, Camille Chalmers.
Konsèy elektoral Jovenel Moïse nonmen an, li depaman ak sa Konstitisyon peyi Dayiti.
Li trayi koutim ak tradisyon ki te egziste nan peyi an, parapò ak jan Konsèy elektoral konn abitye fèt.
Pòt pawòl pati Rasin kan pèp la toujou rete kwè pa gen ankenn kondisyon, ki reyini pou eleksyon fèt nan peyi a.
Ekip, ki sou pouvwa an, gen tan deja kraze tout posiblite pou li fè eleksyon nan peyi a.
Konsèy elektoral li mete kanpe a pa gen ankenn enpòtans, daprè pòt pawòl pati politik Òganizasyon pèp k ap lite (Opl), Danio Siriack, nan mikwo AlterRadio/AlterPresse.
Opl deklare sekirite a, se youn nan eleman, ki ta kapab pèmèt gen eleksyon.
Poutan, ekip, ki sou pouvwa an, simaye gang ak zam toupatou nan peyi a, yon fason pou l wè nan ki mezi li ta ka kontwole tout teritwa nasyonal la, nan lide pou l kapab gen garanti l ap genyen eleksyon yo ankò.
Pati politik Opl di fòk ta gen yon sistèm elektoral k ap mache, pou eleksyon ta ka fèt nan peyi a, alòske rejim Phtk a kraze sistèm sa a, nan objektif pou l mete kanpe yon lòt, ki ka ede yo kontinye rete sou pouvwa a.
Mete sou sa, nan mwens pase 5 mwa, ki rete l sou pouvwa a, Jovenel Moïse p ap gen tan òganize ankenn eleksyon.
Sou bò pa l, Rosemond Pradel, sekretè jeneral pati politik Fizyon sosyo demokrat ayisyen yo (Fizyon), di li pa pran oserye Konsèy elektoral sa a.
Moun, ki asepte antre nan Konsèy elektoral sa a, montre aklè ki jan pa gen okenn moun, ki fè Jovenel Moïse konfyans nan peyi a.
Pati politik Fizyon di li pa wè ankenn posiblite pou moun sa yo òganize ankenn eleksyon.
Jovenel Moïse montre, yon lòt fwa ankò, sitiyasyon pèp ayisyen an pa enterese l.
Se sa k fè se eleksyon ki enterese l, nan yon kontèks kote ensekirite a ap fini ak popilasyon an, daprè pati politik Fizyon.
Pati politik Fizyon di li pa konprann kouman fè Jovenel Moïse di li mete yon Konsèy elektoral sou pye, dapre Konstitisyon 1987 amande a, epi li di li bay moun, li chwazi yo, yon misyon menm Konstitisyon sa a pa otorize.
Nou pa bezwen konnen si eleksyon ap kapab fèt, oswa si p ap gen bon jan kondisyon pou rive nan eleksyon, depi se yon prezidan eli, ki mete kanpe yon Konsèy elektoral, n ap mache ladan. Se dizon yon gwoup, ki rele lig ayisyen dwa moun, ki di li gen baz nan Nòdès, Nò ak Latibonit, ki te patisipe byen fon nan demach Jovenel Moïse yo, pou parèt Kep sa a, anpil sektè te deja di yo p ap mache kole ak li.
Demach Jovenel Moïse, pou nonmen yon nouvo Kep, se pa yon bagay ki depaman ak lalwa. Se sa k fè lig ayisyen dwa moun nan asepte voye reprezantan l.
San l pa konsidere pinga divès sektè, Jovenel Moïse deside monte ofisyèlman, vandredi 18 septanm 2020 an, yon nouvo Konsèy elektoral pwovizwa.
Anplis eleksyon, nouvo Kep sa a, pou premye fwa depi 1987, ta sipoze òganize tou yon referandòm pou tabli yon lòt Konstitisyon.
Yon seri dispozisyon, ki depaman ak Konstitisyon peyi an, ki pa bay prezidan okenn pouvwa pou aji konsa. [rf emb rc apr 21/09/2020 10:10]
Consulter +
