Pòtoprens, 17 septanm 2020 [AlterPresse] --- Sektè demokratik ak popilè a ak pati politik Inifòs voye jete byen lwen menas ak presyon, peyi Etazini ap fè, pou ta gen, prese prese, yon nouvo Konsèy elektoral pwovizwa (Kep), pou fè eleksyon nan peyi d Ayiti.
Kondisyon yo pa reyini pou ankenn eleksyon rive fèt nan peyi a, dapre sa Sektè demokratik ak popilè a di, nan yon nòt ki vin jwenn AlterRadio ak AlterPresse.
Majorite sektè nan lavi nasyonal la, pami yo legliz katolik women ak platfòm òganizasyon ayisyen nan zafè dwa moun, derefize voye reprezantan yo, pou mete kanpe yon lòt Kep, ekip tèt kale, ki sou pouvwa an, vle enstale nan gwo ponyèt.
Si Jovenel Moïse te gen volonte pou fè eleksyon nan peyi a, t ap gen yon palman ki t ap mache kòmsadwa jounen jodia. Se dizon pati politik Inifòs, nan yon entèvyou li bay AlterRadio/AlterPresse.
Pati politik Inifòs di li pa pran oserye menas ak presyon Etazini fè, pou ta gen yon nouvo Konsèy elektoral prese prese nan peyi a.
Nan eta peyi d Ayiti twouve l la, kote yo pa respekte dwa fondamantal moun, kote moun pa sispann tonbe anba bal bandi, li pa ta ka pi mal pase jan l ye a jounen jodia, dapre pati politik Inifòs.
Tout moun, ki pa dakò pou yo mete kanpe yon Konsèy elektoral pwovizwa, nan peyi d Ayiti, ap gen pou peye konsekans yo, dapre peyi Etazini, nan yon tweet, chaje ak menas, anbasad ameriken met deyò.
Detan li di li toujou rete moblize, pati politik Inifòs fè konnen l ap kontinye chita pale ak lòt gwoup nan opozisyon an, nan lide pou jwenn yon solisyon tèt ansanm, pou sòti peyi a nan twou san fon, li twouve l la.
Ayiti dwe fòme yon nouvo Kep, avèk moun ki gen repitasyon onèt, ki gen konpetans, ki pa nan bagay kwochi, pou òganize operasyon eleksyon, ki lib ak jis. Yon demokrasi, k ap mache tout bon, ekzije pou tout branch nan gouvènman an, san bliye palman an, jwe wòl yo, dapre peyi Etazini. [rf emb rc apr 17/09/2020 15:50]
Consulter +
