Pòtoprens, 16 septanm 2020 [AlterPresse] --- Fanmi mèt Monferrier Dorval, bandi sasinen nan dat 28 dawout 2020 an, deside, pou antèman an fèt ak moun pwòch li sèlman, nan yon nòt li met deyò nan dat madi 15 septanm 2020 an.
Nòt lan pa bay detay sou ki kote ak ki lè antèman an ap fèt.
Men, fanmi an di li rete louvri, pou kontinye resevwa mesaj, nan memwa batonye an, detan l di li swete tout moun ap konprann epi respekte desizyon sa a.
Bò kote pa l, Bawo lòd avoka Pòtoprens yo di desizyon fanmi Dorval lan p ap detounen yo, sou kantite aktivite yo te prevwa fè, pou salye memwa batonye an.
Nan sans sa a, avoka yo fè konnen y ap òganize, jedi 17 septanm 2020 an, yon veye espesyal, epi, vandredi 18 septanm 2020 an, y ap fè yon antèman senbolik.
Sekretè bawo avoka Pòtoprens yo, mèt Robinson Pierre-Louis, di li pa an mezi bay esplikaasyon sou desizyon fanmi batonye an.
Men, li fè konnen pa gen anyen ki chanje, nan konviksyon yo genyen, pou batay jouk lajistis met men nan kòlèt tout moun, ki geen men yo tranpe nan kò ansasinay sou mèt Monferrier Dorval lan. [rf emb rc apr 16/09/2020 14:05]
Consulter +
