Pòtoprens, 07 septanm 2020 [AlterPresse] --- Depi nan dat madi premye septanm 2020 an, lè yon seri moun, yo poko idantifye, te retounen ale nan espas krim, lakay mèt Monferrier Dorval lan, nan Pèleren 5, nan menm zòn kote Jovenel Moise rete an, Ofis pwoteksyon sitwayèn ak sitwayen (Opc) fè konnen li gen gwo dout, sou ankèt, yo di k ap fèt, sou kò sasinay mèt Monferrier Dorval lan, 28 dawout 2020 an.
Nan emisyon Tichèz ba, sou antèn AlterRadio, pwotektè sitwayen an, Renan Hedouville, poze kesyon èske se pa nan lide pou mete bouyay nan ankèt lan, ki fè moun yo pa idantifye reyisi retounen lakay batonye defen an, madi premye septanm 2020 an.
Anvan sa k pase madi premye septanm 2020 an, otorite, ki anchaje sekirite nan peyi a, te bay garanti yo gen kontwòl sou espas krim 28 dawout 2020 an.
Nan yon peyi, kote tout enstitisyon yo t ap mache, ta dwe gen plizyè otorite, ki reponn kesyon sou kijan moun fè retounen nan espas, kote krim 28 dawout 2020 an, pou yo fè sa yo pi pito, dapre Ofis pwoteksyon sitwayèn ak sitwayen.
Malgre li rete kwè ankèt sa a pa byen demare, Ofis pwoteksyon sitwayèn ak sitwayen mande popilasyon ayisyèn nan rete mobilize, pou fòse otorite konsène yo ale jis nan bout, nan dosye kò sasinay sou mèt Monferrier Dorval lan.
Ofis pwoteksyon sitwayèn ak sitwayen swete pou gen suivi, ki fèt, nan dosye sasinay sou mèt Monferrier Dorval lan, yon fason pou tout moun, ki genmen yo tranpe nan zak sa a,resevwa sanksyon yo merite, jan lalwa mande sa. [rf emb rc apr 07/09/2020 10:20]
Consulter +
