Pòtoprens, 7 septanm 2020 [AlterPresse] --- Yon moun mouri ak plizyè lòt blese, nan yon atak bandi ak zam fè, samdi 5 septanm 2020 an, nan zòn Bit Bwaye ak Kwadèmisyon, nan komin Taba, daprè enfòmasyon ki rive jwenn AlterRadio/AlterPresse.
Depi plizyè semenn, toujou gen tansyon, tanzantan, anba men moun ak zam, nan Kwadèmisyon ak Bit Bwaye.
Sitiyasyon difisil sa a te pouse anpil moun nan zòn sa yo kouri kite lakay yo.
Gen ladan yo, ki t al pran yon souf sou plas klèsinn nan.
Moun nan zòn nan lonje dwèt sou gwoup gang, ki pot non G9 lan fanmi ak alye ak gwoup Chyen mechan, kòm 2 gwoup gang ki ta dèyè zak sila a.
Se ak dlo nan je anpil moun Bit Bwaye ak Kwadèmisyon te viv sitiyasyon sa a. Yo mande otorite yo pran dispozisyon nesesè, pou asire sekirite yo nan zòn sa yo.
Nan apremididi lendi 31 dawout 2020 an, bò 5è, yon gwoup moun ak zam, ak rad nwa sou yo, te atake zòn Bèlè, ki twouve l nan sant vil Pòtoprens la. Yo te tire anpil kout zam, mete dife nan plizyè kay epi blese plizyè moun.
Meenm gwoup moun ak zam sa yo te retounen , mèkredi 2 septanm 2020 an, sou Bèlè, kote yo blese anpil moun ak bal epi mete dife ankò nan divès kay. [rf emb rc apr 07/09/2020 09:55]
Consulter +
