Pòtoprens, 03 septanm 2020 [AlterPresse] --- Gwoup Konsètasyon patriyotik, ki gen ladan pati politik, pèsonalite ak òganizasyon, lonje dwèt sou sa li rele « zak kriminèl planifye », popilasyon an ap sibi, nan dènye jou sa yo, nan yon nòt ki rive jwenn AlterPresse.
Peyi a pa ka kontinye nan degrengolad sa a, yon gwoup moun san konsyans planifye pou li, dapre gwoup konsètasyon patriyotik la.
Depi kèk jou, gwoup gang ak zam vare sou moun k ap viv Bèlè, blese plizyè moun ak bal, boule anpil kay epi fòse fanmi yo kouri kite zòn nan.
Gwoup Konsètasyon patriyotik kritike ministè enteryè ak ministè jistis ak sekirite piblik la, ki pa poze ankenn aksyon, pou pèmèt peyi a sispan viv nan kè sote.
Kò ansasinay, sou batonye avoka Pòtoprens lan, mèt Monferrier Dorval, dwe fè tout sitwayen, tout pwofesyonèl ak tout aktè politik yo reflechi, dapre gwoup Konsètasyon patriyotik lan, ki poze kesyon sou konpòtman Jovenel Moïse.
Bò kote pa l, senatè Pierre Francois Sildor mande otorite gouvènman yo pran responsablite yo, pou asire sekirite sitwayen k ap viv nan peyi a.
Sildor mande lajistis ak lapolis nasyonal pran dispozisyon, pou kwape sitiyasyon laterè, k ap layite nan peyi a, nan dènye jou sa yo.
« Ankenn moun nan ankenn sektè pa epanye nan sa k genyen nan peyi a, jounen jodia ». [rf emb rc apr 03/09/2020 12:10]
Consulter +
