Pòtoprens, 03 septanm 2020 [AlterPresse] --- Aprè desizyon divès transfè ak lòt dispozisyon administrasyon, kont manm sendika yo, Lapolis nasyonal deside revoke, san avètisman, Abelson Gros Nègre, ki te pòt pawòl Spnh-17 lan, jis nan dat jodia, dapre enfòmasyon ki vin jwenn AlterPresse.
Abelson Gros Nègre, ki te gen 11 lane nan Lapolis la, konsidere se yon mannèv otorite yo ap fè pou fèmen bouch sendika Lapolis la.
Li lonje dwèt sou direktè jeneral Lapolis la, Rameau Normil, li di ki pa gen konpetans pou nan tèt Lapolis la.
Li fè konnen tou li gen tan depoze plent, nan biwo Ofis pwoteksyon sitwayèn ak sitwayen, kont revokasyon sa a.
Nan dat 18 fevriye 2020, Abelson Gros Nègre te pami plizyè manm sendika, direksyon Lapolis nasyonal la te revoke.
Aprè anpil pwotestasyon, direksyon Lapolis la ta pral retounen sou desisyon revokasyon sa yo, nan dat 13 mas 2020.
Èske gen yon plan pou demantibile sendika lapolis nasyonal d Ayiti an, yo rele Spnh-17 lan ? [rf emb rc apr 03/09/2020 11:50]
Consulter +
