Pòtoprens, 02 septanm 2020 [AlterPresse] --- Sekretè jeneral Òganizasyon Eta ameriken yo (Oea), Luis Almagro, mande prezidan Jovenel Moïse, degaje l fè eleksyon, nan peyi a, pou pi ta, nan mwa janvye 2021 k ap vini an.
Se yon demann sektè demokratik ak popilè a voye jete byen lwen.
Luis Almagro panse li ta enpòtan anpil pou Jovenel Moïse òganize, nan yon premye tan, eleksyon pou senatè ak depite, nan mwa janvye 2021 an, pou li ka mete kanpe yon palman k ap fonksyone.
Ep, nan yon lòt tan, eleksyon prezidan, pou li ka pase pouvwa a bay yon prezidan ki pase nan eleksyon.
Mèt Michel Andre, pòt pawòl sektè demokratik ak popilè a, voye jete apèl sa a, Oea lanse bay Jovenel Moïse, pou l òganize eleksyon nan peyi a, nan mwa janvye 2021, k ap vini an.
Pa gen ankenn eleksyon ki posib ak Jovenel Moïse, ni tou p ap gen ankenn tèt ansanm ant Pati ayisyen tèt kale a (Phtk) ak alye l yo. Solisyon an, se mobilizasyon pou n mete sou pye, yon tranzisyon pou n koupe fache ak rejim ki la a, dapre sa sektè demokratik ak popilè a fè konnen.
Nan yon peyi, kote ekip, ki sou pouvwa an, ap pwoteje gwoup gang ak zam yo, pou yo simen laterè nan mitan popilasyon an, pa gen ankenn eleksyon ki posib, dapre òganis dwa moun Sant Karl Levèque (Skl).
Eleksyon sa yo pa t janm rive fèt nan lane 2018, pou te ranplase yon tyè nan sena a epi, nan mwa oktòb ak desanm 2019, pou te ranplase chanm depite a, yon lòt tyè nan sena a ak estrikti kolektivite teritoryal yo. [jep emb rc apr 02/09/2020 09:35]
Consulter +
