Pòtoprens, 27 dawout 2020 [AlterPresse] --- Depi lè operasyon, ki pote non Terminator 1 an, koumanse, nan dat vandredi 7 dawout 2020 an, Lapolis nasyonal di li arete plis pase 50 moun, dapre sa ajans sou entènèt AlterPresse aprann.
Lapolis nasyonal fè konnen tou li sezi 26 zam ak apeprè 230 mil katouch (230 mil bal).
Lapolis nasyonal di tou l ap chèche 25 moun, li sispèk kòm bandi. Deklarasyon pòt pawòl annapre Lapolis la, enspektè Gary Desrosiers.
Lapolis mete men sou plizyè moun, li sispèk kòm manm gang baz 400 mazowo.
Se gang 400 mawozo an ki ta asasinen, lendi maten 3 dawout 2020 an, yon ti bebe 4 mwa, Godson Joseph, ak yon dam, nan lokalite Papay, nan komin Gantye. Manm gang 400 mawozo yo te atake yon bis, ki te gen anpil moun, ki ta pral nan yon lopital, nan Gantye.
Konsènan videyo, moun wè sou rezo sosyal yo, ki montre kouman plizyè ajan Inite depatman pou mete lòd (Udmo) nan Sidès t ap maspinnen yon elèv Lise Penchina Jakmèl (Sidès peyi a), Gary Desrosier di Lapolis ap mennen ankèt, pou gade si se ajan Udmo tout bon vre.
Viktim nan te ansanm ak plizyè elèv, ki t ap manifeste, pou mande pwofesè yo vin f è kou nan sal klas Lise Penchina an. [rf emb rc apr 27/08/2020 09:45]
Consulter +
