Pòtoprens, 27 dawout 2020 [AlterPresse] --- Mèkredi 26 dawout 2020 an, pou youn nan premye fwa, nan listwa peyi an, plizyè sitwayen òganize yon rasanbleman pwotestasyon, douvan Bank tout bank yo, Bank repiblik d Ayiti, yo plis rele Bank santral, nan Pòtoprens, dapre enfòmasyon ajans sou ent ènèt AlterPresse ranmase.
Objektif mouvman sa a, douvan bank santral lan se : ekzije dola a desann douvan goud lan, epitou ekzije mezon transfè yo peye lajan transfè yo nan dola ameriken, nan yon moman kote lavi chè a ap malmennen popilasyon ayisyen an.
Mouvman sa a fèt, detan gouvènè Bank santral la t ap anonse li pran dispozisyon pou kontwole mache chanje lajan an, sou teritwa nasyonal lan.
Manifestan yo lonje dwèt sou gouvènè Bank santral la, Jean Baden Dubois, yo di ki pa ta montre li gen konpetans nan t èt Bank santral. Yo mande Jean Baden Dubois kite pòs gouvènè Bank santral lan.
Popilasyon an pa kapab ankò, dapre manifestan yo, ki fè konnen y ap toujou rete mobilize, jouk dola a ta desann, nan nivo 40 goud pou pi plis.
Bank santral la mete, sou mache a, omwen 47 milyon dola ameriken, pou eseye fè fas kare ak sityasyon, kote valè dola pa sispann monte, douvan goud lan.
Nan mwa dawout 2020 an, ou bezwen 125 goud pou yon dola ameriken. [rf emb rc apr 27/08/2020 09:35]
Consulter +
