Pòtoprens, 26 dawout 2020 [AlterPresse] --- Plizyè pati politik, espesyalman Fizyon sosyo demokrat (Fizyon) ak Mouvman patryotik popilè desalinyen (Mopod), kritike demach degrenn gòch prezidan Jovenel Moïse yo, nan pèsiste pou mete kanpe, poukont li, yon lòt Konsèy elektoral pwoviswa (Kep), nan entèvyou yo bay AlterRadio/AlterPresse.
Nouvo Konsèy sa a t ap fè tout eleksyon, li ta va òganize, pa gen okenn valè, paske se Jovenel Moïse, ki mete l sou pye poukont li.
Konstitisyon an pa bay ankenn prezidan dwa kreye Kep pou kò l.
Anpil prezidan, ki te eseye fè sa, anvan Jovenel Moïse, te echwe, dapre Edmonde Supplice Beauzile, prezidant pati politik Fizyon, ki t ap reponn kesyon AlterRdio/AlterPresse.
Manda prezidan an paka pwolonje.
« Se yon bagay ki enposib, pa gen wout pa bwa : manda Jovenel Moise la ap bout 7 fevriye 2021 », dapre sa pati politik Fizyon fè sonje.
Kriz la ka dire pi lontan, si Jovenel Moïse pèsiste, nan mete kanpe yon Konsèy elektoral pwovizwa bidon, san sektè politik la. Se pral tankou yon sigarèt, rejim tèt kale an ap limen nan de bout, daprè pati politik Mouvman patriotik popilè Desalinyen (Mopod), ki t ap pale ak AlterRadio/AlterPresse.
Pral gen yon pakèt lòt sektè bidon, ki pral nan Kep Jovenel Moise vle mete kanpe a. Sa ki pral debouche sou yon lòt kriz ki pi mal, ki ka menm pwovoke yo pouse do Jovenel Moïse sou pouvwa an, daprè kowòdonatè Mopod la, enjenyè agronòm Jean André Victor.
Enjenyè agronòm Jean André Victor deklare gen 2 faz k ap tann nou : se Kep bidon an, epi eleksyon bidon an.
Plis jou yo ap pase, se plis tout moun ap mete yo dakò Jovenel Moïse p ap ka fè ankenn eleksyon nan peyi a. Se dizon Pati politik Òganizasyon pèp kap lite (Opl), nan deklarasyon li bay AlterRadio/AlterPresse.
Peyi Etazini konsidere Jovenel Moise kòm yon move elèv, ki mete l nan difikilte, jan l ap mennen bak politik peyi d Ayiti an. Se sa k fè twit anbasad ameriken an ale nan sans sa a, dapre pòt pawòl pati politik Òganizasyon pèp k ap lite an, Danio Siriack.
Nan yon mesaj, li ekri sou kont ’’twitter’’ li, anbasad Etazini nan peyi d Ayiti « ankouraje gouvènman ayisyen an kenbe tèt li nan plede fè sòti pakèt dekrè li yo, sèvi avèk pouvwa sa a sèlman pou planifye eleksyon lachanm yo ak pou zafè ki gen rapò ak lavi, lasante ak sekirite, jiskaske lachanm yo retabli ak kapab reprann responsabilite Konstitisyon an ba yo ».
Pou Opl, Federasyon gwoup gang ak zam yo, ki jwenn sipò pouvwa a, ak deklarasyon Jovenel Moïse te fè sou zafè eleksyon an, kote l te di pa gen moun k ap ka pran eleksyon nan men ekip tèt kale an ankò, se 2 eleman ki lage kominote entènasyonal la nan gwo tèt chaje. [rf jep emb rc apr 26/08/2020 15:40]
Consulter +
