Pòtoprens, 23 dawout 2020 [AlterPresse] —- Omwen 9 moun pèdi lavi yo, gen 2 lòt moun ki disparèt, nan moman siklòn Laura an t ap pase dimanch 23 dawout 2020 an, dapre premye enfòmasyon ajans sou entènèt AlterPresse ranmase.
Gwo lapli, gwo kout van ak kondisyon danje sou lanmè : se sa siklòn Laura ap kite sou peyi d Ayiti. Imidite, siklòn Laura ap trennen dèyè l, ap lakoz lapli, jis madi 25 dawout 2020 an.
Detan yo mande popilasyon an pran anpil prekosyon, otorite yo toujou entèdi aktivite bato sou lanmè an, ki move anpil, bò tout kòt peyi d Ayiti yo.
Gouvènman Joseph Jouthe la anonse dispozisyon, pou pote akonpayman bay moun ki sinistre nan inondasyon divès kote, sou teritwa nasyonal la.
Pwoteksyon sivil mande popilasyon an tann konsiy otorite yo, anvan yo reprann aktivite yo kòmsadwa, apre siklòn Laura an fin pase sou peyi d Ayiti.
Pwoteksyon sivil ak divès kowòdinasyon, nan depatman Plato santral ak Latibonit, envite kominote, ki nan zòn gwo tonton rivyè latibonit lan, tankou nan zòn gwo dlo Pelig la, kite zòn sa yo, akoz rivyè yo k ap debòde san gade dèyè.
Gen gwo danje, pou kantite dlo, baraj Pelig lan ap ap resevwa, ta lakoz li kraze. Pral gen anpil dlo nan depatman Latibonit nan, akoz baraj Pelig lan pa ka kenbe kantite dlo li genyen yo ankò, dapre ministè travo piblik.
Dapre yon espesyalis, Pelig se yon lak atifisyèl, ki resevwa dlo divès rivyè, ki pran sous li ni nan peyi d Ayiti ni nan Repiblik Dominiken. Dapre li, responsab Elektrisite d Ayiti yo pa t janm panse retire dlo a, nan tan sa nesesè, pou te jwenn pi bon nivo nesesè nan Lak Pelig lan. [apr 23/08/2020 19:00]
Consulter +
