Pòtoprens, 17 dawout 2020 [AlterPresse] --- Premye minis ayisyen an, Joseph Jouthe, di li pran nòt sou kè kase, Biwo entegre nasyon zini (Binuh) di li genyen, sou ogmantasyon zak laterè, bandi ap simen sou teritwa nasyonal lan.
Premye minis la fè konnen lajistis ak lapolis pral rapousuiv, jis yo jwenn ansyen polisye nasyonal, chèf gang yo rele Jimmy Cherizier, yo plis konnen sou non Babekyou.
Li fè deklarasyon sa a nan mikro plizyè jounalis, apre yon seremoni, samdi 15 dawout 2020 an, kote yo t ap remèt yon rapò sou mache achte ak vann gaz.
Nan yon rapò, Biwo entegre nasyon zini te mande otorite yo mete men nan kòlèt tout endividi ak zam, k ap simen latwoublay nan peyi a, espesyalman nan katye popilè yo, pami yo Jimmy Cherizier.
Jimmy Cherizier se youn nan chèf gwoup G-9 fanmi ak alye. Non li sòti nan divès rapò òganizasyon dwa moun nan peyi a, kòm moun ki mele nètalkole nan divès masak, ki fèt nan peyi a.
Medya entènasyonal yo enterese anpil nan dosye Jimmy Cherizier an.
Apre Euro News, jounal ameriken Washington Post di Jimmy Cherizier se yon senbòl, ki montre nan ki nivo Leta nan peyi d Ayiti p ap mache sou baz dwa. Se yon senbòl, ki montre kouman y ap maspinen lalwa nan peyi d Ayiti.
Nan yon deklarasyon li fè nan jounal ameriken an Washington Post, Jimmy Cherizier fè konnen li pare pou li mete zam nan men timoun yo.
Se yon bagay ki gen tan fèt deja. Gen anpil timoun ki gen zam nan men yo deja, daprè Rezo nasyonal k ap defann dwa moun yo (Rnddh).
Joseph Jouthe pa di anyen sou plizyè rapò òganis dwa moun ayisyen yo mete deyò, depi plizyè mwa, sou konfyolo Jimmy Cherizier ak ofisyèl, tankou imaj kote misye ap kale kò l douvan blennde lapolis nasyonal lan. [jep emb rc 17/08/2020 10:30]
Consulter +
