Haiti
Atik

Ayiti-Football : Ernst Jean-Joseph, ansyen jwè seleksyon nasyonal foutbòl lan, mouri vandredi 14 dawout 2020 an


Ekri jou vandredi 14 out 2020

Pòtoprens, 14 dawout 2020 [AlterPresse] --- Ansyen jwè seleksyon nasyonal foutbòl lan, Ernst Jean-Joseph, ki te gen 72 lane sou tèt li, mouri vandredi 14 dawout lan lakay li, nan Dèlma 31, dapre enfòmasyon ki vin jwenn ajans sou entènèt AlterPresse.

Ernst Jean-Joseph, se youn nan foutbolè Ayiti ki te jwe koup dimond Fifa nan peyi Almay, nan lane 1974.

Li se ansyen defansè santral « Violette Athletic Club », soti 1969 rive 1977. Li te chanpyon ak « Violette » nan lane 1977.

Li te pase nan ekip ’’AS Capoise’’, nan lane 1969, anvan li t al jwe nan Sting Chicago, nan lane 1978.

Se yon moun ki te renmen lavi, zanmi, anbyans, gwoup, yon moun poze, menmsi ou pa fèt pou pwovoke l, yon moun ki fran, dirèk. Se dekripzyon sa a, ansyen foubolè Philippe Vorbe fè sou Ernst Jean-Joseph, ki te jwe nan menm ekip avè l, « Violette ».

Vorbe fè konnen tou defen an te fè yon karyè antrenè. Li te manm estaf teknik Violette lan, ki chanpyon nan Konfederasyon foubòl peyi Amerik di Nò, Amerik Santral ak Karayib yo, yo plis konnen sou non Konkakaf, nan lane 1984.

Li te chanpyon Konkakaf kòm jwè, ak seleksyon nasyonal foutbòl lan.

Nan lane 1971 ak 1977, li te fini 2 zyèm nan Konkakaf ak seleksyon nasyonal foutbòl lan. Li chanpyon tou kòm antrenè ak Violette.

Daprè Philippe Vorbe, se gran sè ansyen jwè an, Marie-Antoinette, ki anonse l nouvèl lanmò sa a.

Sè an fè l konnen «Tinès » (ti non jwèt Ernst Jean-Joseph) te gen pwoblèm vizyon, li te gen tan bwè kafe ak fanmi an, anvan lanmò l.

Lè moun nan fanmi yo wè li pa tounen pou dejene, lè yo al nan chanm li, yo wè l te gen tan frèt, siy ki montre li mouri yon bon moman.

Se te yon zanmi, yon kanmarad foutbòl, yon pasyone foutbòl, yon moun ki te gen moman difisil nan vil, men ki te toujou fè fas kare ak yo, daprè temwayaj Ralph Kernizan, ansyen patnè li.

« Monn foutbòl lan pèdi yon gwo jwè ». [mff emb rc apr 14/08/2020 14:40]