Pòtoprens, 12 dawout 2020 [AlterPresse] --- Mannèv rejim tèt kale, ki sou pouvwa an, ap fè, nan aktivite dwategòch, tout voum se do, li rele dyalòg kominotè a, montre, yon lòt fwa ankò, ki jan ekip tèt kale an vle fini ak imaj peyi a, dapre pati politik Mouvman popilè desalinyen (Mopod), nan yon deklarasyon bay ajans sou entènèt AlterPresse.
Mopod di li genyen gwo lapenn, lè li wè kouman pouvwa anplas la ap eseye poze tout gwo pwoblèm peyi a, tankou pwoblèm ensekirite a, nan yon aktivite, ki pote non dyalòg kominotè.
Se yon zak anplis, ki montre nan ki nivo rejim Pati aysyen tèt kale an ap fini ak imaj peyi a.
Pwoblèm krim san parèy, peyi a ap viv depi kèk tan, pi konplike, pase jan otorite yo panse l la, dapre youn nan pòt pawòl Mopod yo, Raphael André, nan yon entèvyou li bay AlterRadio.
Mopod plede pou otorite yo mete yon politik sekirite sou pye, nan lide pou fè fas kare ak pwoblèm sa a, tout bon vre.
Pati politik Mopod lonje dwèt tou sou kominote entènasyonal la, li konsidere kòm konplis nan mennen peyi d Ayiti, kote l ye jounen jodi a.
Yon lòt bò, Mopod konsidere kòm yon zak pèsekisyon politik, konvokasyon biwo Inite lit kont koripsyon an voye bay senatè Youri Latortue, nan kad dosye lajan li te prete nan Lona.
Gen yon latriye gwo dosye koripsyon, ki fè anpil pale nan sosyete a. Men, biwo Inite lit kont koripsyon an pa janm bay dizon l sou yo, ni fè ankenn demach pou konvoke moun ki gen non yo site yo, malgre divès rapò Lakoudèkont voye nan enstitisyon sila a.
Pati politik Mouvman popilè desalinyen denonse otorite Leta yo, li di k ap plede itilize lajistis, kòm zouti pou pèsekite moun ki pa dakò ak rejim politik tèt kale an. [jep emb rc apr 12/08/2020 10:25]
Consulter +
