Haiti
Atik

Ayiti-Dwa moun : Nan sitiyasyon latèrè, gang ak zam yo ap simen nan peyi a, yon lòt Kep p ap ka òganize ankenn eleksyon


Ekri jou mèkredi 5 out 2020

Pòtoprens, 4 dawout 2020 [AlterPresse] --- Menm si Jovnèl Moyiz ta rive met sou pye yon lòt estrikti Konsèy elektoral pwovizwa nan peyi a, li p ap ka òganize ankenn eleksyon serye, lib e libè, avèk sitiyasyon kote bandi ak zam ap simen latèrè, toupatou sou teritwa nasyonal lan.

Se deklarasyon Platfòm òganizasyon ayisyen dwa moun yo bay AltèRadyo/AltèPrès.

Akote krim san parèy, gang ak zam yo ap fè nan peyi a, tout sektè nan peyi a pa fè gouvènman, ki la a, konfyans.

Sekirite ak konfyans, se 2 kondisyon fondamantal pou ta gen bon jan eleksyon lib, onèt, demokratik, ki fèt nan peyi a.

Platfòm òganizasyon ayisyen dwa moun yo pa t gen ankenn pwoblèm pèsonèl ak Jean Simon Saint-Hubert, ki te reprezante sektè dwa moun yo nan Kep a. Platfòm lan te mande l demisyone, paske pa t gen ankenn kondisyon ki te reyini, nan peyi a, pou te pale zafè eleksyon.

Jounen jodi a, kondisyon sa yo pa chanje. Se sa k fè sektè dwa moun nan pa pale sou kesyon pou ta voye yon moun nan Konsèy elektoral la, nan menm kondisyon sa a, dapre Platfòm òganizasyon ayisyen dwa moun yo.

Bò kote pa l, ansyen depite Bélizaire Printemps voye jete tout mannèv prezidan Jovenel Moïse ap fè, pou li òganize eleksyon nan peyi a.

Ansyen depite Bélizaire Printemps fè konnen gen yon pakèt estrikti politik, ki koumanse ap antann yo sou yon sèl objektif, nan lide pou yo goumen ansanm, jouk yo kraze sitiyasyon difisil, peyi a ap viv depi yon bon bout tan.

Regwoupman politik, yo rele Blòk demokratik pou rebati nasyon an, voye yon pinga bay enstitisyon, tankou legliz, sektè prive, asosyasyon jounalis, elatriye, ki ta konte voye delege, nan estrikti tèt chaje Konsèy elektoral pwovizwa a, pou eleksyon pike kole, Jovnèl Moyiz vle òganize an.

Jovnèl Moyiz ap chèche nenpòt enstitisyon nan vodou an, pou di li chwazi sektè vodou a, alòske Konstitisyon 1987 la bay kouman pou mete kanpe yon konsèy elektoral.

Blok demokratik lan di li pare pou l goumen, ak zam lalwa. Li p ap patisipe nan mete kanpe yon mòd Kep konsa.

Ankenn sektè pa dwe patisipe nan mete kanpe yon Konsèy elektoral konsa, ki se yon vagabondaj, jan Jovnèl Moyiz lan vle fè l lan, pou vin òganize yon eleksyon pike kole.

Blòk demokratik pou rebati nasyon an anonse l ap òganize yon woumble entènasyonal, sou entènèt, soti vandredi 7 pou rive dimanch 9 dawout 2020 an.

Aktivite sa a ap fèt sou plizyè sijè. L ap reyini ayisyen nan peyi d Ayiti, kou lòt bò dlo, ki gen konpetans nan domèn ekonomi, lajistis, elatriye. [jep emb rc apr 04/08/2020 21:10]