Haiti
Atik

Ayiti-Eleksyon : Demach Jovnèl Moyiz pou mete kanpe yon lòt Konsèy elektoral, se byen konte mal kalkile, dapre pati politik Fizyon


Ekri jou madi 4 out 2020

Pòtoprens, 4 dawout 2020 [AlterPresse] --- Tout demach k ap fèt, bò kote gouvènman an, pou mete kanpe yon lòt Konsèy elektoral pwovizwa (Kep) nan peyi a, se byen konte mal kalkile.

Se dizon pati politik Fizyon sosyo demokrat yo, nan yon entèvyou li bay AltèRadyo/AltèPrès.

Okenn sektè pa ka deside voye yon reprezantan nan Kep an, san l pa pase douvan palman an, dapre prezidant Fizyon an, Edmonde Supplice Beauzile.

Pati a di pa gen wout pa bwa, Jovnèl Moyiz ap kite pouvwa a pou pita 7 fevriye 2021 k ap vini an, anvan yo mete yon gouvènman tranzisyon nan peyi a.

Tout sektè, ki antann kolabore ak Jovnèl Moyiz, nan mete sou pye yon Kep, ap tou foure tèt nan yon demach pou kraze peyi a, tankou jan rejim Pati ayisyen tèt kale an (Phtk) a ap fè l, depi lè yo pran pouvwa a, daprè Fizyon sosyo democrat yo.

Sou bò pa l, Duclos Bénissoit, ki se kòdonatè jeneral Mouvman inifye transpòtè ayisyen yo, di li pa konprann kouman fè prezidan repiblik la ap aji an gwo ponyèt, lè li enpoze yon delè, bay sektè sendikal lan, pou l ta voye reprezantan l nan konsèy elektoral pwovizwa a.

Se yon konpòtman diktatè, dapre Mouvman inifye transpòtè ayisyen yo.

Sendika transpò sa a fè konnen, premye demach pou Jovnèl Moyiz ta fè, anvan menm li mete sou pye yon lòt Kep, se ta chèche jwenn yon akò ak divès sektè nan lavi nasyonal la, sou òganizasyon eleksyon nan peyi a.

Mouvman inifye transpòtè ayisyen yo di li pral reyini ak divès manm sendika an, pou yo sòti yon pozisyon ofisyèl sou korespondans laprezidans lan.

Demokrasi pa fonksyone san eleksyon, daprè manbo Euvonie Georges Auguste, ki fè konnen, limenm, sektè vodou a gen tan konnen ki moun l ap voye nan Konsèy elektoral pwovizwa a, sizoka prezidan repiblik lan ap mete l kanpe.

Euvonie Georges Auguste leve lavwa kont konpòtman moun, nan divès sektè, li di ki kanpe an kwa kont tout demach Jovnèl Moyiz ap fè pou li òganize eleksyon yo nan peyi a.

Sektè vodou a plede pou yon dyalòg fran ant tout sektè nan lavi nasyonal la.

« Peyi ap viv yon moman difisil, kote pouvwa lejislatif la p ap fonksyone, alòske li se yon pouvwa kle nan direksyon peyi a. Nan vid enstitisyon sa a, prezidan repiblik la dwe anchaje l pou l renouvle pesonèl politik lan ».

Apre demisyon 8 manm Kep yo, nan dat vandredi 24 jiyè 2020 an, Jovnèl Moyiz reprann demach ankò, nan objektif pou ka remete an plas prese prese yon lòt Kep.

Jovnèl Moyiz kontinye derefize fè bon jan chita pale ak tout sektè yo, pou ta jwenn yon solisyon nan kriz, k ap brase bil peyi an, depi kèk tan. [jep emb rc apr 04/08/2020 10:50]