Haiti
Atik

Ayiti-Anviwonman : Avètisman gwo lapli ak menas siklòn, finisman jiyè 2020 an, sou peyi d Ayiti


Ekri jou mèkredi 29 jiyè 2020

Pòtoprens, 29 jiyè 2020 [AlterPresse] --- Apati jedi maten 30 jiyè 2020 an, byen bonè, ap gen gwo lapli, k ap vin pi fò pandan jounen an, sou peyi d Ayiti, dapre sa pwoteksyon sivil anonse nan yon bilten, ajans enfòmasyon sou entènèt AltèPrès te li.

Gwo lapli sa yo ka frape peyi d Ayiti jis rive vandredi 31 jiyè 2020, dapre sa pwoteksyon sivil prevwa.

Se pou sa li voye yon avètisman koulè oranj, ki vle di posiblite gwo lapli nan peryòd rive 31 jiyè an.

Se yon posiblite siklòn, ki ka rive sou kòt Nò peyi d Ayiti, avèk gwo lapli, apati jedi 30 jiyè 2020 an. Lapli an ap tonbe prèske san rete. Firamezi, l ap vin pi fò divès kote.

Popilasyon an ap kapab santi efè siklòn sa a, jis rive vandredi 31 jiyè an. L ap kapab wè tan an mare, ak anpil nyaj, avèk efè siklòn nan.

Akoz posiblite siklòn sa a, otorite yo entèdi aktivite bato, chaloup, bwa fouye yo sou tout kòt peyi d Ayiti yo.

Depi aswè mèkredi 29 jiyè 2020 an, ap gen danje sou lanmè an, k ap move anpil.

Vag yo ap monte jis 9 pye wotè bò kòt Sid yo, 8 pye wotè bò kòt Nò ak bò kòt zile Lagonav, ki an fas Pòtoprens. [rc apr 29/07/2020 17:00]