Pòtoprens, 27 jiyè 2020 [AlterPresse] --- Sou demann plizyè òganizasyon potestan, plizyè milye fidèl potestan pran lari, dimanch 26 jiyè 2020 an, nan kapital lan, Pòtoprens, kont dekrè kòd penal prezidan Jovnèl Moyiz lan, dapre sa ajans enfòmasyon sou entènèt AltèPrès ranmase.
Dapre sa fidèl potestan sa yo deklare, dekrè kòd penal sa a pa daplon ak reyalite sosyete ayisyen an.
Manifestasyon an te koumanse nan nivo moniman 3 men, pa twò lwen aryopò entènasyonal Pòtoprens lan.
Manifestan yo pase plizyè kote nan kapital lan.
« Legliz di non ak imoralite, non ak masi madi, non ak moun k ap chanje sèks » ; se sa yo ta ka li sou bandwòl manifestan yo tee gen nan men yo.
Te gen 2 gwo cha, ki ta p pase mizik, pou kreye anbyans nan manifestasyon an.
Nan yon anbyans kanaval, manifestasyon an te reyini plizyè milye fidèl, ki soti nan plizyè legliz nan zòn metwopoliten Pòtoprens lan.
Konsèy nasyonal espirityèl legliz d Ayiti, Legliz Shalom, Federasyon pwotestan d Ayiti, Shekina, Legliz Ròk Solid, se kèk pami òganizasyon, nan legliz potestan yo, ki te kore mouvman desann nan lari an, kont dekrè kòd penal Jovnèl Moyiz lan.
Manifestan yo mande pou gen bon jan pase men nan dekrè kòd penal sa a, sitou nan sa ki gen arevwa ak oryantasyon moun nan fè bagay . [jep emb rc apr 27/07/2020 09:35]
Consulter +
