Haiti
Atik

Ayiti-Krim : Òganis dwa moun Jilap ak Fjkl, pati politik Mopòd leve vwa yo byen wo kont zak bandi, k ap simen laterè nan peyi a


Ekri jou lendi 29 jen 2020

Pòtoprens, 29 jen 2020 [AlterPresse] --- Òganis dwa moun Komisyon legliz katolik women Jistis ak lapè (Jilap) ak Fondasyon je klere (Fjkl), pati politik Mouvman patriyotik popilè desalinyen (Mopòd), fè gwo kout rèl dèyè otorite Leta yo, k ap sipòte bandi nan simaye dèy nan peyi a, nan entèvyou yo bay AltèRadyo/AltèPrès.

Douvan sitiyasyon ensekirite malouk peyi a ap viv depi kèk tan, otorite konsène yo dwe sispann pale met la. Se pou yo koumanse tanmen bon jan aksyon, dapre Jilap.

Bandi ak zam yo kontinye ap simen laterè, sitou nan katye popilè yo.

Se pa jodi a, bandi ak zam yo ap fè Krim san parèy sa yo, san yo pa sibi okenn pinisyon pou move zak yo. Leta pa montre okenn volonte politik pou kwape zak bandi yo nan sosyete an, dapre Jistis ak lapè.

Jistis ak lapè swete otorite, ki gen konpetans pou sa, rann piblik rezilta ankèt, yo di y ap mennen sou divès zak ki fèt nan sosyete a.

Li mande yo tou, pou kontwole zam k ap antre soti nan peyi a.

Ekip, ki sou pouvwa an, montre aklè li bay Federasyon gang yo mwayen ekonomik pou yo kapab vin pi fò, sitou ak prezans Frantz Ibérice nan tèt Kès asistans sosyal lan.

Se chèf gang, ki rele Krisla an, ki mande palè nasyonal mete Frantz Ibérice nan pòs direktè Kès asistans sosyla lan, dapre deklarasyon Fondasyon je klere bay AltèRadyo.

Frantz Iberice se yon jèn ki t ap travay nan pati politik Mouvman twazyèm vwa a, ki remèt demisyon li, pou li te ka vin pran pòs direktè Kès asistans sosyal lan.

Sou bò pa l, pati politik Mopòd kritike konpòtman otorite yo nan Leta a, ki vle fè bandi yo antre nan yon wout, kote yo pa gen anyen pou wè ak lalwa nan peyi a.

Se sa k fè otorite yo pa janm di anyen, malgre se chak jou fanmi ayisyen yo ap sibi move zak anba men atoufè yo.

Mopòd di li pa nòmal, nan yon rejim demokrasi, pou yon Leta ap afiche yon konpòtman konsa, kote pouvwa a rete nan men yon ti ponyen moun.

Rejim nan bay prezidan Jovnèl Moyiz tout pouvwa, pou l fè tout kalte zak, pou l rete sou pouvwa a, dapre Mopòd. [rf jep emb rc apr 29/06/2020 10:10]