Ayiti-Anviwonman : Danje inondasyon sou 4 nan 10 depatman peyi a, ak lapli k ap tonbe jis madi 16 jen 2020 an

Pòtoprens, 14 jen 2020 [AlterPresse] --- Jis rive madi 16 jen 2020, gen posiblite lapli ak loraj sou plizyè depatman nan peyi a, dapre sa espesyalis meteyo nan peyi d Ayiti konsidere.

Se yon ti boulvès nan aniwonman an, avèk sa yo rele yon onn twopikal, k ap lakoz lapli ak loraj sou depatman Nip ak Grandans, depatman Sid, Sidès, Latibonit, Plato santral ak Lwès, kote Pòtoprens chita.

Men, li posib pou gen inondasyon nan depatman Nip, Grandans, Latibonit ak Plato santral.

Sou lanmè a, ap gen lapli ak loraj tou. Kaptenn bato, chaloup, bwa fouye yo dwe pran anpil prekosyon, sitou bò kòt Sid peyi d Ayiti, kote vag yo ka monte jis rive 7 pye wotè.

Nan dènye jou sa yo, divès depatman resevwa bon jan lapli nan apremidi ak aswè.

Sonje nou nan peryòd siklòn, jis rive lendi 30 novanm 2020.

Dimanch 14 jen 2020 an, depi anvan 4 trè apremidi, nan divès kote nan Pòtoprens, moun te ka tande loraj k ap gwonde tanzantan. Tousuit apre, nyaj te koumanse parèt.

Tan an te pare, tan an te byen mare. Sa ki te anonse lapli an ap rive nan pi ta.

Jisteman, nan divès katye, tankou nan lakomin Dèlma, lapli te koumanse tonbe nan apremidi dimanch 14 jen 2020 an. [rc apr 14/06/2020 16:00]