Pòtoprens, 8 jen 2020 [AlterPresse] --- Nouvo bidjè 2019-2020, gouvènman an deside a, depaman ak Konstitisyon peyi d Ayiti a, dapre entèvyou plizyè òganizsyon politik bay AltèRadyo/AltèPrès.
Responsab kominikasyon pati polititik Oganizasyon pèp k ap lite (Opl), Danio Siriack, fè konnen Konstitisyon ayisyen an pa bay gouvènman an dwa pou li deside, poukont li ,sou bidjè peyi a.
Fòk ta gen yon palman ki vote bidjè a. Mete sou sa, fòk lakou dèkont ta bay dizon l, dapre pati politik Opl.
Danio Siriack di li pa konprann ki jan fè objektif bidjè sa a chita sou Kovid-19 la, alòske se depi mwa oktòb 2019 gouvènman an ap aplike bidjè an.
Lòt objektif bidjè sa a, se ranfòse sekirite anndan peyi a.
Pati politik Oganizasyon pèp k ap lite di li gen gwo kè kase, pou pi fò kòb la pa sèvi nan ranfòse gwoup gang k ap simen laterè nan peyi a.
Opl kritike tou otorite yo, ki pa bay Ministè agrikilti plis enpòtans nan bidjè sa a, nan yon moman kote peyi a ap viv yon grav kriz lamanjay.
Sou bò pa l, pati politik Mouvman patriyotik popilè desalinyen (Mopòd) kwè se yon bidjè ki depaman ak lalwa.
Otorite yo pa respekte yon seri prensip, anvan menm yo deside nouvo bidjè sa a, dapre Raphael Andre, manm Mopòd.
Anplis, gen plizyè sektè nan lavi nasyonal la, ki poko gade nan ki mezi bidjè sa a ka daplon ak reyalite nan peyi a.
Pou Mopòd, bidjè sa a se yon mannèv otorite yo, nan lide pou yo kontinye gagote lajan peyi an.
Pati politik Mouvman patriyotik popilè desalinyen swete popilasyon an leve kanpe kont tout moun, ki responsab mizè peyi a ap viv depi kèk tan…
Sou kesyon nouvo bidjè sa a, òganizasyon Mouvman demokratik popilè (Modep) voye yon pinga sou mannèv otorite yo ap fè, pou kontinye prije popilasyon an, ki deja nan difikilte.
Se nan dat vandredi 5 jen 2020 an, nan yon konsèy minis, gouvènman ayisyen an deside yon nouvo bidjè pou egzèsis 2019-2020 an, k ap bout mèkredi 30 septanm 2020 an.
Bidjè sa a prevwa plis pase 198 milya goud, kontrèman ak plis pase 145 milya goud bidjè 2017-2018 lan, yo te rekondui 2 fwa.
Nan yon moman, kote gen gwo kesyon, sou eta sistèm sante a, gouvènman an deside mete plis pase 15 milya goud anplis, sou total lajan ministè sante piblik lan.
Nan sans sa a, yo prevwa plis pase 21 milya goud pou ministè sante piblik, ki te gen sèlman plis pase 5 milya goud nan bidjè 2017-2018 lan.
Ministè ekonomi ak finans di l ap prepare yon plan ijans, ki ta sipoze remete kanpe ekonomi ak finans peyi a, pou lè mikwòb Kovid-19 lan pa bay poblèm ankò. [rf jep emb rc apr 08/06/2020 10:20]
Consulter +
