Pòtoprens, premye jen 2020 [AlterPresse]--- Deklarasyon sekretè jeneral Òganizasyon leta ameriken yo (Oea) a, Luis Almagro, ki fè konnen manda Jovenel Moïse ta dwe bout 7 fevriye 2022, pa gen ankenn enpotans, dapre sa pòt pawòl sektè demokratik popilè a, Mèt Michel André, di, nan yon nòt li voye bay ajans enfòmasyon sou entènèt AltèPrès.
Sektè demokratik popilè a fè konnen Oea se yon òganizasyon ki nan koripsyon, se yon òganizasyon popilasyon an pa gen konfyans nan li.
Anplis, atik 134-2 Konstitisyon an di aklè manda Jovnèl Moyiz lan ap bout 7 fevriye 2021.
Se tout popilasyon an ki dwe batay, pou fè Konstitisyon an respekte.
Sou bò pa l, responsab Kominikasyon pati politik Òganizasyon pèp k ap lite (Opl), Danio Siriack, lonje dwèt sou Pati ayisyen tèt kale an (Phtk), ki vle rete sou pouvwa a, yon fason pou l ka pwoteje tèt li, parapò ak tout dega li deja fè nan resous peyi a.
Pale anpil, ki genyen sou dire manda Jovnèl Moyiz lan, se yon mannèv pouvwa a ak alye l yo ap fè, nan lide pou gade nan ki mezi yo ka òganize eleksyon, pou mete moun pa yo sou pouvwa a, dapre Opl.
Jovnèl Moyiz p ap ka fè eleksyon, kelkeswa mwayen li ta itilize.
Pati politik Òganizasyon pèp k ap lite mande tout moun, nan opozisyon an ak nan sosyete sivil lan, mete yo ansanm, nan lide pou bloke pwojè Pati ayisyen tèt kale an. [jep emb rc apr 01/06/2020 11:51]
Consulter +
