Pòtoprens, premye jen 2020 [AlterPresse] --- Òganizasyon sitwayèn ak sitwayen pou yon lòt peyi d Ayiti di li gen gwo lapèn, aprè lanmò sispèk yon prizonye, nan penitansye nasyonal, lannuit jedi 28 me 2020 an.
Prizonye sa a, ki mouri a,, te gen kèk siy, ki sanble ak Kovid-19 la, dapre sa Òganizasyon sitwayèn ak sitwayen pou yon lòt peyi d Ayiti fè konnen, nan yon nòt li voye bay ajans enfòmasyon sou entènèt AltèPrès.
Òganizasyon dwa moun lan mande otorite nan Ministè sante piblik yo pran kèk mezi prese prese, nan lide pou anpeche plizyè lòt prizonye pèdi lavi yo.
Se pou premye fwa, gen yon moun ki mouri ofisyèlman nan yon prizon, nan kondisyon sispèk sa a.
Òganizasyon sitwayèn ak sitwayen pou yon lòt peyi d Ayiti di li te posib pou evite lanmò sa a. Se pou sa, depi nan koumansman kriz lasante an, nan mwa mas 2020 an, li te toujou ap atire atansyon otorite lasante yo, sou move kondisyon prizonye yo nan prizon yo.
Nan dat samdi 30 me 2020, se 2 mil 124 moun, ki trape mikwòb Kovid-19 lan (kowonaviris lan) nan peyi Dayiti. Pami yo, gen 44 moun ki mouri ak 24 lòt ki geri. [jep emb rc apr 01/06/2020 11:21]
Consulter +