Ayiti-Politik : Chirepit konsènan ki lè manda prezidan Jovenel Moise lan ap bout

Pòtoprens, 27 me 2020 [AlterPresse] --- Plizyè òganizasyon politik ak dwa moun fè konnen manda prezidan Jovenel Moise la ap bout 7 fevriye 2021, alòske misye di l ap kite pouvwa 7 fevriye 2022.

Pa gen ankenn dout sou sa. Manda Jovenel Moise la ap bout 7 fevriye 2021, daprè sa direktè egzekitif Sant analiz ak rechèch sou dwa moun, Mèt Gedeon Jean, fè konnen, nan yon rapò ki rive jwenn ajans enfòmasyon sou entènèt AltèPrès.

Detan peyi d Ayiti anba gwo menas kowonaviris lan, Jovnèl Moyiz sou wout pou l anvlimen kriz politik la, nan peyi a, lè l deklare se nan lane 2022 manda l ap bout, dapre analiz òganis Jurimedia.

Jurimedia kwè li nesesè pou aktè politik yo jwenn yon chimen, pou al chita ansanm diskite san pèdi tan.

Jurimedia denonse tout tantativ yon seri moun, ap fè, pou triye ki atik nan Konstitisyon an yo ta sipoze respekte.

Jurimedia mande tout aktè yo mete tèt yo ansanm, pou jwenn yon solisyon nan kriz, peyi a ap viv pandan tan sa yo.

Ministè afè etranjè fèk mande chèf misyon diplomatik ayisyen pran tout dispozisyon nesesè, pou yo kapab jwenn sipò enstitisyon entènasyonal yo oubyen Leta peyi kote yo ye yo, pou òganize eleksyon, nan lane 2020, nan peyi d Ayiti.

Jovnèl Moyiz di li gen volonte pou l òganize eleksyon lib, demokratik, nan lide pou l remèt pouvwa a bay yon lòt prezidan, nan dat 7 fevriye 2022, dapre sa ministè afè etranjè fè konnen, nan yon lèt li voye bay chèf misyon diplomatik ayisyen yo aletranje. [rf emb rc apr 27/05/2020 13:30]